કેનેડાના વડાપ્રધાન જસ્ટિન ટ્રુડોની લિબરલ સરકારને જોરદાર ઝટકો લાગ્યો છે. ટ્રુડો સરકારમાં ન્યૂ ડેમોક્રેટિક પાર્ટીના નેતા અને કેનેડામાં ખાલિસ્તાનીઓના સમર્થક જગમીત સિંહે સમર્થન પાછું ખેંચવાની જાહેરાત કરી છે. સિંહે એક વીડિયો સંદેશમાં કહ્યું કે તેઓ ૨૦૨૨માં બંને લોકો વચ્ચે થયેલા કરારને તોડી રહ્યા છે.તેમણે વિપક્ષી કન્ઝર્વેટિવ પાર્ટીનો યોગ્ય રીતે સામનો ન કરી શકવા બદલ ટ્રુડોની ટીકા કરી.જયારે પોલમાં કન્ઝર્વેટિવ પાર્ટીની જીતની આગાહી કરવામાં આવી છે. સિંહે કહ્યું, 'ઉદારવાદીઓ ખૂબ નબળા, ખૂબ સ્વાર્થી અને કોર્પેારેટ હિતો માટે સમર્પિત હોય છે. એટલા માટે તેઓ લોકો માટે લડી શકતા નથી. તેઓ પરિવર્તન લાવી શકતા નથી. તેઓ આશાઓ મેળવી શકતા નથી.

ટ્રુડો માટે મુશ્કેલ સમય
જગમીત સિંહે આગળ કહ્યું, 'મોટી કંપનીઓ અને સીઈઓની સરકાર રહી છે. હવે લોકોનો સમય છે. એનડીપીના પગલાથી જસ્ટિન ટ્રુડોની સરકાર માટે તાત્કાલિક ખતરો નથી, પરંતુ તેનો અર્થ એ છે કે બજેટ પસાર કરવા અને વિશ્વાસ મત જીતવા માટે તેમને હાઉસ ઓફ કોમન્સમાં અન્ય વિપક્ષી સભ્યોના સમર્થનની જરૂર પડશે.

ટ્રુડોની લોકપ્રિયતામાં ભારે ઘટાડો
એનડીપીએ ૨૦૨૨ માં જસ્ટિન ટ્રુડો સાથે હાથ મિલાવ્યા, ૨૦૨૫ના મધ્ય સુધી તેમની સરકારને ટેકો આપવાનું વચન આપ્યું. બદલામાં એનડીપીને સામાજિક કાર્યક્રમો માટે વધારે ભંડોળ મળ્યું. નવેમ્બર ૨૦૧૫માં કેનેડાના વડા પ્રધાન તરીકેની જવાબદારી સંભાળનાર જસ્ટિન ટ્રુડોની લોકપ્રિયતામાં ભારે ઘટાડો થયો છે. કેનેડામાં તાજેતરના મતદાનો સૂચવે છે કે કેનેડિયન મતદારો ટ્રુડોના નેતૃત્વમાં ખુશ નથી , ટ્રુડોની સાથી એનડીપીની પણ આવી જ સ્થિતિ છે જે મતદારોમાં ઉત્સાહના અભાવ સાથે સંઘર્ષ કરી રહી છે.