અમેરિકાએ ભારતમાં થયેલા આતંકવાદી હુમલાની કડક શબ્દોમાં નિંદા કરી છે અને કહ્યું છે કે તે આ દુઃખદ ઘડીમાં ભારતની સાથે ઉભું છે. યુએસ સ્ટેટ ડિપાર્ટમેન્ટના પ્રવક્તા ટેમી બ્રુસે કહ્યું,કે રાષ્ટ્રપતિ ટ્રમ્પ અને સેક્રેટરી ઓફ સ્ટેટ રુબિયોએ પહેલાથી જ સ્પષ્ટ કરી દીધું છે, અમેરિકા ભારતની સાથે ઉભું છે અને આતંકવાદના દરેક કૃત્યની કડક નિંદા કરે છે.આ હુમલામાં જીવ ગુમાવનારાઓ માટે અમે પ્રાર્થના કરીએ છીએ, ઘાયલોના ઝડપથી સ્વસ્થ થવાની કામના કરીએ છીએ અને ઈચ્છીએ છીએ કે આ જઘન્ય હુમલાના ગુનેગારોને ન્યાય મળે.હુમલામાં પાકિસ્તાનની ભૂમિકા અંગે અમેરિકા તરફથી સ્પષ્ટ ટિપ્પણી માંગવામાં આવતા, પ્રવક્તાએ કહ્યું કે અમેરિકા પરિસ્થિતિ પર નજીકથી નજર રાખી રહ્યું છે. ટેમી બ્રુસે કહ્યું, 'આ એક ઝડપથી બદલાતી પરિસ્થિતિ છે અને અમે તેના પર ખૂબ નજીકથી નજર રાખી રહ્યા છીએ. અમે હાલમાં કાશ્મીર કે જમ્મુની પરિસ્થિતિ પર કોઈ સત્તાવાર વલણ અપનાવી રહ્યા નથી.

ટ્રમ્પે પીએમ મોદી સાથે વાત કરી

અમેરિકાના રાષ્ટ્રપતિ ડોનાલ્ડ ટ્રમ્પે પહેલગામ આતંકવાદી હુમલા પર કહ્યું કે કાશ્મીરથી આવતા સમાચાર સાંભળીને તેઓ દુઃખી છે. આતંકવાદ સામે અમેરિકા ભારતની સાથે ઉભું છે. આ હુમલામાં જીવ ગુમાવનારાઓ માટે અમે શાંતિ માટે પ્રાર્થના કરીએ છીએ અને ઘાયલો ઝડપથી સ્વસ્થ થાય તેવી કામના કરીએ છીએ. આ ઘડીમાં, અમારો સંપૂર્ણ ટેકો અને ઊંડી સંવેદનાઓ પ્રધાનમંત્રી નરેન્દ્ર મોદી અને ભારતના લોકો સાથે છે.