સુરેન્દ્રનગર જીલ્લામાં મુળી તાલુકાના સાંગધ્રા તાલુકાની સીમમાં આવેલ વાડીમાંથી એસએમસીની ટીમે દરોડો પાડી અહીંથી દારૂનો મોટો જથ્થો ઝડપી લીધો હતો.પોલીસે વાડીમાંથી રૂ.૮૧.૯૭ લાખની કિંમતનો ૪૨,૩૦૦ બોટલ દારૂ અને બે વાહન સહિત કુલ રૂ.૮૨.૧૭ લાખનો મુદામાલ કબજે કર્યો હતો.પોલીસે અહીં વાડીમાં દારૂ ઉતારનાર સહિત ત્રણ શખસો સામે ગુનો નોંધી કાયદેસરની કાર્યવાહી કરી હતી.

દારૂના આ દરોડાની જાણવા મળતી વિગતો મુજબ,એસએમસીના વડા નિર્લિપ્ત રાયના માર્ગદર્શન હેઠળ ડીવાએસપી કે.ટી.કામરીયાની રાહબરીમાં પીએસઆઇ એન.એચ.ચુડાસમા તથા તેમની ટીમ પેટ્રોલીંગમાં હતી દરમિયાન મળેલી બાતમીના આધારે મુળી તાલુકાના સાંગધ્રા ગામની સીમમાં આવેલ હરેશ જેમાભાઈ સારદીયા (રહે. સાંગધ્રા તા.મુળી) ની વાડીમાં દરોડો પાડયો હતો.

દરોડા દરમિયાન વાડીમાંથી ઈંગ્લીશ દારૂની બોટલો નંગ-૪૨, ૩૦૦ કિંમત રૂા. ૮૧,૯૭,૯૬૮ અને બે બાઈક કિંમત રૂા. ૨૦,૦૦૦ સહિત કુલ રૂા.૮૨,૧૭,૯૬૮નો મુદ્દામાલ કબ્જે કર્યો હતો. જ્યારે વાડીમાં ઈંગ્લીંશ દારૂ સંગ્રહ કરનાર મુખ્ય આરોપી હરેશ સારદીયા હાજર મળી ન આવતા એસએમસી ટીમે ગુન્હો નોંધી કાયદેસરની કાર્યવાહી હાથધરી છે. તેમજ ઈગ્લીશ દારૂનો જથ્થો મંગાવનાર અને મોકલનાર બન્ને શખસો સામે પણ ગુન્હો નોંધી કાયદેસરની કાર્યવાહી કરી હતી.