થોડો સમય શાંતિ રહ્યા પછી રાજાશાહી પરત લાવવાની માંગણી સાથે નેપાળમાં ફરી એકવાર વિરોધ પ્રદર્શનો શરુ થયા. રાજાશાહીના સમર્થકોએ રવિવારે રાજધાની કાઠમંડુમાં રેલી કાઢી. તેમણે માર્ચમાં યોજાનારી ચૂંટણી પહેલાં રાજાને પુનઃસ્થાપિત કરવાની માંગ કરી.સપ્ટેમ્બરમાં અસંતુષ્ટ જેન -ઝેડ યુવાનો દ્વારા હિંસક વિરોધ પ્રદર્શનો બાદ, વચગાળાની સરકારની રચના કરવામાં આવી હતી, અને માર્ચમાં નવી સંસદીય ચૂંટણીઓ યોજાવાની છે. જનરલ-ઝેડ ચળવળ પછી પદભ્રષ્ટ રાજા જ્ઞાનેન્દ્રના સમર્થકો દ્વારા આ પહેલી રેલી હતી.

18મી સદીમાં શાહ રાજવંશની સ્થાપના કરનારા રાજા પૃથ્વી નારાયણ શાહની પ્રતિમાની આસપાસ સહભાગીઓ એકઠા થયા અને "અમે અમારા રાજાને પ્રેમ કરીએ છીએ" ના નારા લગાવ્યા. "રાજા પાછા લાવો" ના નારા લગાવવામાં આવ્યા. છેલ્લા રાજા, રાજા જ્ઞાનેન્દ્રને રાજગાદી છોડવાની ફરજ પડી હતી, અને 2008 માં સત્તાવાર રીતે રાજાશાહી નાબૂદ કરવામાં આવી હતી, દેશને પ્રજાસત્તાક જાહેર કરવામાં આવ્યો હતો.

વિરોધમાં ભાગ લેનારા સમ્રાટ થાપાએ કહ્યું હતું કે, "આ દેશ માટે છેલ્લો અને એકમાત્ર વિકલ્પ રાજા અને રાજાશાહી છે. 'જનરલ-ઝેડ' ચળવળ પછી દેશે જે માર્ગ અપનાવ્યો છે તે જોતાં, પરિસ્થિતિને નિયંત્રિત કરવા માટે રાજાશાહી પુનઃસ્થાપિત કરવી જરૂરી છે.

ગયા વર્ષની રેલીમાં બેના મોત થયા હતા

જેન -ઝેડ પેઢીને 1997 થી 2012 ની વચ્ચે જન્મેલા લોકો તરીકે વ્યાખ્યાયિત કરવામાં આવી છે.ગયા વર્ષે માર્ચમાં, રાજાના સમર્થનમાં યોજવામાં આવેલી એક રેલીમાં બે લોકો માર્યા ગયા હતા. જો કે રવિવારનો મેળાવડો શાંતિપૂર્ણ રહ્યો કારણ કે તોફાન પોલીસે ઘટના પર નજર રાખી હતી.