વડાપ્રધાન નરેન્દ્ર મોદીની ઇઝરાયલની સંભવિત મુલાકાત પહેલા ઘરેલુ રાજકીય તણાવ વધુ તીવ્ર બન્યો છે, કારણ કે વિપક્ષી નેતા યાયર લેપિડે પરંપરા મુજબ, જો સુપ્રીમ કોર્ટના વડાને આમંત્રણ ન આપવામાં આવે તો સંસદમાં મોદીના સંબોધનનો બહિષ્કાર કરવાની ધમકી આપી છે.નોંધનીય છે કે મોદી 25 ફેબ્રુઆરીએ બે દિવસની મુલાકાત માટે ઇઝરાયલ પહોંચશે તેવી અપેક્ષા છે. તેઓ નેસેટ (ઇઝરાયલી સંસદ) ને સંબોધવાના છે. મોદી ઇઝરાયલી વડા પ્રધાન બેન્જામિન નેતન્યાહૂ અને રાષ્ટ્રપતિ આઇઝેક હર્ઝોગને પણ મળશે.વિપક્ષી નેતા લેપિડે આગ્રહ કર્યો છે કે સુપ્રીમ કોર્ટના ચીફ જસ્ટિસ યિત્ઝાક અમિતને મોદીના સંસદમાં સંબોધન માટે આમંત્રિત કરવામાં આવે. વિપક્ષી પક્ષના સૂત્રો કહે છે કે આ બહિષ્કારનું આહ્વાન નથી, પરંતુ સરકાર ઇરાદાપૂર્વક અમને શરમજનક બનાવવાનો પ્રયાસ કરી રહી છે.

લેપિડે સંસદમાં જણાવ્યું હતું કે, અમે ભારતીય દૂતાવાસ સાથે વાત કરી હતી. તેઓ આ અંગે ચિંતિત છે. ભારતીય વડા પ્રધાન મોદીને આગામી બુધવારે ઇઝરાયલી સંસદમાં આમંત્રણ આપવામાં આવ્યું છે, જે આપણા બધા માટે સન્માનની વાત છે. લેપિડે કાયદા ઘડનારાઓને કહ્યું હતું કે,જો ગઠબંધન ભારતીય વડા પ્રધાન સાથેના ખાસ સત્ર દરમિયાન સુપ્રીમ કોર્ટના વડાનો બહિષ્કાર કરે છે, તો અમે ચર્ચામાં ભાગ લઈ શકીશું નહીં.તેમને વધુમાં ઉમેર્યું હતું કે અમે નથી ઇચ્છતા કે ભારત અમારા કારણે શરમ અનુભવે, અને એક અબજ લોકોના દેશના વડા પ્રધાન અહીં અડધી ખાલી સંસદની સામે ઉભા છે. ઇઝરાયલનું સ્થાનિક રાજકારણ ન્યાયિક સુધારાઓ પર ગરમાગરમ ચર્ચામાં ફસાયેલું છે.

મુખ્ય ન્યાયાધીશ અને નેતન્યાહૂ સરકાર વચ્ચે વિવાદ

જ્યારથી યિત્ઝાક જાન્યુઆરી 2025 માં સુપ્રીમ કોર્ટના પ્રમુખ તરીકે ચૂંટાયા હતા, ત્યારથી ન્યાય પ્રધાન યારીવ લેવિને મુખ્ય ન્યાયાધીશ તરીકે તેમની સત્તાને માન્યતા આપવાનો ઇનકાર કર્યો છે અને તેમની સાથે મળવાનો કે તેમને કોર્ટના વડા તરીકે સંબોધવાનો ઇનકાર કર્યો છે. રાષ્ટ્રીય કાયદા અનુસાર, મુખ્ય ન્યાયાધીશ તરીકે તેમનું નામ પણ નથી.