ઉપલેટા નગરપાલિકાની તાજેતરમાં યોજાયેલી ચૂંટણીમાં રાજકોટ જિલ્લા ભાજપના મહામંત્રી રવિ માકડીયાએ રૂપિયા લઈને ટિકિટ વેચી હોવાના વાયરલ થયેલા પત્રનો મામલો હજુ શાંત પડ્યો નથી ત્યાં આ મામલે પોલીસ ફરિયાદ થયા પછી પોલીસે તપાસમાં પોતાને ટોર્ચર કર્યા હોવાનો આક્ષેપ ઉપલેટા ભાજપના આગેવાન અશોક લાડાણીએ કરતા આ સમગ્ર પ્રકરણમાં બળતણમાં ઘી હોમાયુ હોય તેવું બન્યું છે.

જોકે પોલીસ આવા આક્ષેપનો ઇનકાર કરીને જણાવે છે કે સોશિયલ મીડિયાના માધ્યમથી ભાજપનો એક લેટર વાયરલ થયો હતો. જે મામલે એક અરજી થતા તપાસ માટે પોલીસે કેટલાક લોકોને બોલાવી પૂછપરછ કરી હતી. આમાં કોઈને હેરાન પરેશાન કરાયા નથી કે ટોર્ચર કરવામાં આવેલ નથી. આ સમગ્ર બાબત સાઇબર ક્રાઇમની તપાસનો વિષય છે અને તેમાં તપાસ ચાલુ છે. જો કોઈ મામલે ખોટું થયા હોવાનું સામેલ વ્યક્તિઓને લાગતું હોય તો તે ફરિયાદ કરી કાર્યવાહી કરી શકે છે.

અમરેલી અને રાજકોટ શહેર તથા જિલ્લામાં ભાજપના આંતરિક વિવાદના નામે અનેક પત્ર અને વિડિયો અવારનવાર વાયરલ થતા હોય છે. આવો જ વિડીયો ઉપલેટા નગરપાલિકાની ચૂંટણીમાં રાજકોટ જિલ્લા ભાજપ મહામંત્રી રવિ માકડીયાને લગતો પત્ર વાયરલ થયો હતો અને તેમાં તેમણે ઉમેદવારોની પસંદગીમાં રૂપિયા લઈને ટિકિટ આપી હોવાનો આક્ષેપ કરાયો છે.

ઉપલેટા નગરપાલિકાની ચૂંટણી પૂરી થયા પછી એટલે કે 22 ફેબ્રુઆરીના રોજ આ વિવાદિતપત્ર વાયરલ થયો હતો અને તેમાં રવિ માકડીયા સામે પૈસા લઈને ટિકિટ આપવા સહિત અનેક પ્રકારના ગંભીર આક્ષેપો કરવામાં આવ્યા છે. અશોક લાડાણીએ આ પત્ર ભાજપના ગ્રુપમાં મુકતા વિવાદ વકર્યો હતો અને પોલીસમાં ફરિયાદ અરજી કરવામાં આવી છે. ફરિયાદ અરજી મળ્યા પછી પોલીસે તપાસ માટે ભાજપના કેટલાક આગેવાનો અને કાર્યકરોને નિવેદન માટે પોલીસ સ્ટેશન બોલાવ્યા હતા અને અશોક લાડાણીના ઘરેથી તેને પોલીસ સ્ટેશન લાવવામાં આવ્યા હતા.