પાકિસ્તાને નાણાકીય વર્ષ 2024-25માં તેના બજેટ લક્ષ્યાંકને પૂર્ણ કરવા માટે ચીન જેવા મુખ્ય સહયોગી પાસેથી 12 અબજ ડોલરની લોન લેવાનો નિર્ણય કર્યો છે. રોકડની તંગીનો સામનો કરી રહેલા દેશમાં IMFની ટીમ આવવાની ધારણા છે. જૂનમાં રજૂ થનારા બજેટ પહેલા વૈશ્વિક ધિરાણકર્તા સાથે નવા લોન પ્રોગ્રામ માટેની વાટાઘાટો માટે મે ના મધ્યમાં શરૂ થવાની ઉમ્મીદ છે.

સાઉદી અરેબિયા સહિત ઘણા દેશોની લેશે મદદ
નાણા મંત્રાલયના સૂત્રોના જણાવ્યા અનુસાર સાઉદી અરેબિયા પાસેથી પાંચ અબજ ડોલર, સંયુક્ત આરબ અમીરાત (યુએઈ) પાસેથી ત્રણ અબજ ડોલર અને ચીન પાસેથી ચાર અબજ ડોલરની મદદ લેવામાં આવશે. તેમજ આગામી નાણાકીય વર્ષમાં ચીન તરફથી વધુ નવા ધિરાણના અંદાજો પણ સામેલ કરવામાં આવશે.

પાકિસ્તાનને IMF પાસેથી મોટી અપેક્ષા
પાકિસ્તાનને નવા લોન પ્રોગ્રામ હેઠળ ઇન્ટરનેશનલ મોનેટરી ફંડ (IMF) પાસેથી એક અરબ ડોલરથી વધુની રકમ મળશે. જ્યારે વિશ્વ બેંક અને એશિયન ડેવલપમેન્ટ બેંક તરફથી નવેસરથી ધિરાણનો પણ અંદાજિત બજેટમાં સમાવેશ કરવામાં આવ્યો છે.