પોરબંદરમાં પી.જી.વી.સી.એલ. કચેરીના કમ્પાઉન્ડમાં વડના ઝાડ પર દસ ફૂટ લાંબો અજગર આવી ચડતા કોઇ કર્મચારીનુ ધ્યાન જતા સ્નેકકેચરોને બોલાવવામાં આવ્યા હતા અને મહામહેનતે તેને નીચે ઉતારવામાં આવ્યો હતો.
જાણવા મળતી વિગત પ્રમાણે પોરબંદર પી.જી.વી.સી.એલ.ની મુખ્ય કચેરીમાં આવેલા વર્ષો જુના વડલાના ઝાડ ઉપર અચાનક સળવળાટ થતા અને વિચિત્ર પ્રકારનો અવાજ આવતા પી.જી.વી.સી.એલ.ના કોઇ કર્મચારીઓનુ વૃક્ષ ઉપર ધ્યાન જતા દસ ફૂટ લંબાઇ ધરાવતા વિકરાળ અજગરને જોઇને હોસકોસ ઉડી ગયા હતા અને મોટી સંખ્યામાં પી.જી.વી.સી.એલ. કર્મચારીઓ ઉપરાંત બીલ ભરવા આવેલા ગ્રાહકો પણ એકત્ર થઇ ગયા હતા અને સ્નેક કેચરોને જાણ કરતા ત્રણ જેટલા સ્નેકકેચરોએ તેનુ રેસ્કયુ કર્યુ હતુ. પી.જી.વી.સી.એલ. કચેરીમાં અજગર ઘુસી ગયાની સમગ્ર શહેરમાં વાયુવેગે વાત ફેલાઇ જતા અમુક લોકો તેને નિહાળવા માટે ખાસ વીજકચેરીએ દોડી ગયા હતા. રેસ્ક્યુ કરવામાં આવેલ અજગર અંદાજે દસ ફૂટ લંબાઇનો અને ૧૦૦ કિલો વજનનો હોવાનુ જાણવા મળ્યુ છે અને આ અજગર બાચકામાં પુરીને વનવિભાગને સોંપી દેવાયો હતો.
ઉલ્લેખનીય છે કે ચોમાસાના અંતિમ દિવસોમાં પોરબંદર શહેર અને આજુબાજુના વિસ્તારમાં સાપ અને અજગર જેવા વન્યજીવોનો ઉપદ્રવ વધવા પામ્યો છે ત્યારે સ્નેકકેચરોની દોડધામ પણ વધી છે.