ભારતીય ક્રિકેટ કંટ્રોલ બોર્ડ (બીસીસીઆઈ) 3 જૂને નરેન્દ્ર મોદી સ્ટેડિયમ ખાતે યોજાનાર ઇન્ડિયન પ્રીમિયર લીગ (આઈપીએલ) 2025 ના સમાપન સમારોહ દરમિયાન ભારતીય સશસ્ત્ર દળોને ખાસ સન્માન આપશે. આ નિર્ણય ઓપરેશન સિંદૂરની સફળતાને ધ્યાનમાં રાખીને લેવામાં આવ્યો છે જેમાં ભારતીય સશસ્ત્ર દળોએ પાકિસ્તાન અને પાકિસ્તાન કબજા હેઠળના કાશ્મીર (પીઓકે) માં અનેક આતંકવાદી ઠેકાણાઓનો નાશ કર્યો હતો.

આ હુમલો એવા આતંકવાદીઓ પર કરવામાં આવ્યો હતો જેઓ જૈશ-એ-મોહમ્મદ, લશ્કર-એ-તૈયબા અને હિઝબુલ મુજાહિદ્દીન જેવા સંગઠનો સાથે સંકળાયેલા હતા. એપ્રિલ 2025 માં પહેલગામમાં થયેલા આતંકવાદી હુમલામાં 26 નિર્દોષ લોકોએ જીવ ગુમાવ્યા હોવાથી ઓપરેશન સિંદૂર શરૂ કરવામાં આવ્યું હતું, જેના જવાબમાં આ કાર્યવાહી કરવામાં આવી હતી.

હવે ઓપરેશન સિંદૂરની સફળતા આઈપીએલમાં પણ ઉજવવામાં આવશે. બીસીસીઆઈએ એક ખાસ આયોજન કર્યું છે, જે આઈપીએલ 2025ના સમાપન સમારોહમાં જોવા મળશે. આ સમારોહ 3 જૂને અમદાવાદના નરેન્દ્ર મોદી સ્ટેડિયમમાં આઈપીએલની ફાઇનલ મેચ શરૂ થાય તે પહેલાં યોજાશે. બીસીસીઆઈના સચિવ દેવજીત સૈકિયાએ સ્પોર્ટસ્ટારને જણાવ્યું હતું કે ભારતીય ક્રિકેટ ગવર્નિંગ બોડીએ ચીફ ઓફ ડિફેન્સ સ્ટાફ તેમજ આર્મી, નેવી અને એરફોર્સના વડાઓને આમંત્રણ આપ્યું છે.

બોર્ડ આપણા સશસ્ત્ર દળોની બહાદુરી, હિંમત અને નિઃસ્વાર્થ સેવાને સલામ કરે છે, જેમના 'ઓપરેશન સિંદૂર' હેઠળના પરાક્રમી પ્રયાસો રાષ્ટ્રનું રક્ષણ અને પ્રેરણા આપતા રહે છે. શ્રદ્ધાંજલિ તરીકે, અમે સમાપન સમારોહ સશસ્ત્ર દળોને સમર્પિત કરવાનું નક્કી કર્યું છે.

આઈપીએલ 2025 ને એક અઠવાડિયા માટે મુલતવી રાખવામાં આવી હતી, ત્યારબાદ 17 મેના રોજ ટુર્નામેન્ટ ફરી શરૂ થઈ હતી. લીગ ફાઇનલ અગાઉ 25 મેના રોજ કોલકાતામાં રમાનારી હતી. જોકે, ભારત અને પાકિસ્તાન વચ્ચેના તણાવને કારણે, આ ટુર્નામેન્ટની ફાઇનલ હવે 3 જૂને યોજાશે.