કર્ણાટક પોલીસે બેંગલુરુમાં ક્રિકેટર વિરાટ કોહલીના પબ, વન8 કોમ્યુન સામે એફઆઈઆર દાખલ કરી છે. આ પબ બેંગલુરુમાં રત્નમ કોમ્પ્લેક્સના છઠ્ઠા માળે આવેલો છે. ક્યુબન પાર્ક પોલીસે બેંગલુરુમાં વિરાટ કોહલીના વન8 કોમ્યુન પબ અને રેસ્ટોરન્ટ સામે કોપ્ટા એક્ટ (સિગારેટ અને અન્ય તમાકુ ઉત્પાદનો અધિનિયમ)નું ઉલ્લંઘન કરવા બદલ કેસ નોંધ્યો છે.

રેસ્ટોરન્ટમાં નો સ્મોકિંગ ઝોન હોવાથી કોપ્ટા એક્ટની કલમ 4 અને 21 હેઠળ પબ સામે કેસ નોંધવામાં આવ્યો છે. એવું કહેવામાં આવી રહ્યું છે કે પબમાં સ્મોકિંગ એરિયા અંગે જરૂરી નિયમોનું પાલન કરવામાં આવી રહ્યું નથી. આ કાયદા હેઠળ, જાહેર સ્થળોએ ધૂમ્રપાન કરવા માટે કડક નિયમો નક્કી કરવામાં આવ્યા હતા, અને તેનું પાલન ન કરવું એ કાયદેસર ગુનો માનવામાં આવે છે.

વન8 કોમ્યુનને અગાઉ પણ કાર્યવાહીનો સામનો કરવો પડ્યો છે. ગયા વર્ષે જૂનમાં પણ તેની સામે એફઆઈઆર નોંધવામાં આવી હતી. ગ્રેટર બેંગલુરુ મ્યુનિસિપલ કોર્પોરેશને પણ ડિસેમ્બરમાં ફાયર વિભાગ પાસેથી એનઓસી ન લેવા બદલ રેસ્ટોરન્ટને નોટિસ જારી કરી હતી.

આ પબની શાખાઓ પુણે, બેંગ્લોર, દિલ્હી, મુંબઈ, કોલકાતા, ગુરુગ્રામ જેવા શહેરોમાં છે. આ રેસ્ટોરન્ટ બે વર્ષ પહેલાં ડિસેમ્બર 2023 માં બેંગ્લોરમાં ખોલવામાં આવી હતી.