જાણવા મળતી વિગતો મુજબ, તાલુકા પોલીસ મથકના પીઆઇ ડી.એમ.હરિપરાની રાહબરી હેઠળ ટીમ પેટ્રોલીંગમાં હતી દરમિયાન કોન્સ. ઉગાભાઇ બાળા, અક્ષયભાઇ નાથાણી અને નિકુંજભાઇ મારવીયાને મળેલી બાતમીના આધારે જય સરદાર રોડ સાંકેત પાર્ક હવેલી એપાર્ટમેન્ટ પાસેથી એક શખસને શંકાસ્પદ એકટિવા સાથે ઝડપી લીધો હતો.પોલીસે આ શખસની પુછતાછ કરતા તેણે પોતાનું નામ ઉપેન્દ્ર છત્ર બહાદુર બહોરા(ઉ.વ ૨૦ રહે. હાલ લક્ષ્મીના ઢોળા પાસે,રાજકોટ, મૂળ નેપાળ) હોવાનું જણાવ્યું હતું. પોલીસે બાઇકના કાગળો માંગતા આ શખસ ગલ્લા તલ્લા કરવા લાવ્યો હતો. બાદમાં પોલીસે આ વાહનના નંબર પોકેટ કોપ એપમાં સર્ચ કરતા આ વાહન ચોરીનું હોવાનું માલુમ પડયું હતું. જેથી આ શખસની આગવી ઢબે પુછતાછ કરતા તેણે બે મહિના પહેલા જય સરદાર રોડ પર હવેલી એપાર્ટમેન્ટના પાર્કિંગમાંથી આ વાહન ચોરી કર્યાની કબુલાત આપી હતી. જે અંગે તાલુકા પોલીસ મથકમાં ગુનો નોંધાયો હતો. પોલીસે રૂ. ૨૦ હજારની કિંમતનું આ વાહન કબજે કરી આરોપીની ધરપકડ કરી ધોરણસરની કાર્યવાહી કરી હતી.