નીરજ ચોપરાની ફેન ફોલોઈંગ માત્ર ભારતમાં જ નહીં પરંતુ વિદેશમાં પણ ઝડપથી વધી રહી છે તેનું તાજેતરનું ઉદાહરણ સોશિયલ મીડિયા પર વાયરલ થઈ રહેલા એક વીડિયોમાં જોવા મળ્યું છે. જ્યાં એક યુરોપિયન ફેન્સે નીરજ ચોપરાને તેનો મોબાઈલ નંબર પૂછ્યો હતો.

બે વખત ઓલિમ્પિક મેડલ જીતી ચૂકેલા નીરજ ચોપરા ચાહકો માટે ઓટોગ્રાફ સાઈન કરી રહ્યા હતા. તે દરમિયાન બે છોકરીઓ તેની પાસે આવીને નીરજ સાથે ફોટો ક્લિક કરાવ્યો હતો, પરંતુ જેવો તે ત્યાંથી જવા લાગ્યો ત્યારે અચાનક એક છોકરીએ તેની પાસે તેનો મોબાઈલ નંબર માંગ્યો હતો.

આ વીડિયો ઝડપથી વાયરલ થઈ રહ્યો છે અને નીરજ ચોપરાની નમ્રતા અને શાલીનતાએ ફરી એકવાર લોકોના દિલ જીતી લીધા છે. જ્યારથી આ વીડિયો સોશિયલ મીડિયા પ્લેટફોર્મ X પર પોસ્ટ કરવામાં આવ્યો છે, તેને 5 લાખથી વધુ વ્યૂઝ મળી ચૂક્યા છે. આના પર સેંકડો કમેન્ટ્સ પણ આવી છે. જો કે તે સ્પષ્ટ નથી થયું કે આ વીડિયો ક્યારે આવ્યો છે, પરંતુ સોશિયલ મીડિયા યુઝર્સનું માનવું છે કે તે બ્રસેલ્સ, બેલ્જિયમમાં ડાયમંડ લીગની ફાઈનલ પછીનો છે.

નીરજ ચોપરા ભારતમાં સોશિયલ મીડિયા પર પ્રખ્યાત છે. 14 સપ્ટેમ્બર શનિવારની મોડી રાત્રે, નીરજે તૂટેલા હાથ સાથે ડાયમંડ લીગની ફાઇનલમાં પ્રવેશ કર્યો હતો. સોશિયલ મીડિયા પર દરેક વ્યક્તિ તેના જુસ્સાને જોઈને આશ્ચર્યચકિત થઈ ગઈ હતી.