પૂર્વી લદ્દાખમાં વાસ્તવિક નિયંત્રણ રેખા (LAC) પાસેના વિવાદિત વિસ્તારોમાં ભારત અને ચીનના સૈનિકો વચ્ચે તણાવ ચાલુ છે. જો કે બંને પક્ષો વાતચીત દ્વારા સ્થિતિને સામાન્ય બનાવવાનો પ્રયાસ કરી રહ્યા છે. દરમિયાન ભારત અને ચીન પૂર્વી લદ્દાખના બાકીના સંઘર્ષ વિસ્તારોમાંથી સૈનિકોને સંપૂર્ણપણે પાછા ખેંચવા માટે તાત્કાલિક કાર્યવાહી કરવા અને તેમના પ્રયાસો વધારવા સંમત થયા.

રાષ્ટ્રીય સુરક્ષા સલાહકાર (NSA) અજીત ડોભાલે સેન્ટ પીટર્સબર્ગમાં ચીનના વિદેશ મંત્રી વાંગ યી સાથે વાતચીત કરી. વાટાઘાટો દરમિયાન  સરહદ પર લાંબા સમયથી ચાલી રહેલી સમસ્યા માટે ઉકેલ પર ધ્યાન કેન્દ્રિત કરવામાં આવ્યું હતું. વિદેશ મંત્રાલયના જણાવ્યા અનુસાર ડોભાલે વાંગને કહ્યું કે દ્વિપક્ષીય સંબંધોમાં સામાન્યતા પુનઃસ્થાપિત કરવા માટે સરહદી વિસ્તારોમાં શાંતિ અને LACનું સન્માન જરૂરી છે.

ડોભાલ અને વાંગ વચ્ચેની મુલાકાત રશિયન શહેર સેન્ટ પીટર્સબર્ગમાં બ્રિક્સ દેશોના રાષ્ટ્રીય સુરક્ષા સલાહકારોની કોન્ફરન્સ દરમિયાન થઈ હતી. બ્રિક્સમાં બ્રાઝિલ, રશિયા, ભારત, ચીન અને દક્ષિણ આફ્રિકા સામેલ છે.

સંઘર્ષ વિસ્તારો પર વાત કરવા સંમત

વિદેશ મંત્રાલયે કહ્યું કે બેઠક દરમિયાન  બંને પક્ષોએ વાસ્તવિક નિયંત્રણ રેખા(LAC) પર બાકી રહેલા મુદ્દાઓના વહેલા ઉકેલ માટેના તાજેતરના પ્રયાસોની સમીક્ષા કરી. નિવેદનમાં કહેવામાં આવ્યું છે કે, "બંને પક્ષો તાત્કાલિક કાર્યવાહી કરવા અને બાકીના સંઘર્ષ વિસ્તારોમાંથી સૈનિકોને સંપૂર્ણપણે પાછી ખેંચવા માટે તેમના પ્રયાસોને આગળ વધારવા માટે સંમત થયા હતા."

પ્રોટોકોલને ધ્યાનમાં રાખીને થશે વાતચીત

મંત્રાલય કહે છે કે "બંને પક્ષોએ ભૂતકાળમાં થયેલા દ્વિપક્ષીય કરારો અને પ્રોટોકોલનું સંપૂર્ણ પાલન કરવું જોઈએ." બંને પક્ષો એ વાત પર સહમત થયા કે ભારત અને ચીન વચ્ચેના દ્વિપક્ષીય સંબંધો માત્ર બંને દેશો માટે જ નહીં પરંતુ ક્ષેત્ર અને વિશ્વ માટે પણ મહત્વપૂર્ણ છે. તેઓએ વૈશ્વિક અને પ્રાદેશિક પરિસ્થિતિ પર પણ વિચારોનું આદાન પ્રદાન કર્યું.