બોલિવૂડના પ્રખ્યાત ડાયરેક્ટર રોહિત શેટ્ટીના જુહુ સ્થિત બંગલાની બહાર થયેલા ફાયરિંગ કેસમાં મુંબઈ ક્રાઈમ બ્રાન્ચે વધુ એક મોટી સફળતા મેળવી છે. એન્ટી-એક્સટોર્શન સેલે આ હુમલા માટે હથિયાર પૂરા પાડનાર મુખ્ય આરોપી આસારામ ફાસલે ઉર્ફે બાબુની ધરપકડ કરી છે. ૧ ફેબ્રુઆરીની મધ્યરાત્રિએ થયેલી આ ઘટનાએ આખા બોલિવૂડમાં ખળભળાટ મચાવી દીધો હતો.

કોણ છે આ ‘બાબુ’ અને તેની ભૂમિકા શું હતી?
મુંબઈ ક્રાઈમ બ્રાન્ચના જણાવ્યા અનુસાર આસારામ ફાસલે ઉર્ફે બાબુ જ તે વ્યક્તિ છે જેણે શૂટર્સને હથિયારો પૂરા પાડ્યા હતા. એન્ટી-એક્સટોર્શન સેલે બાતમીના આધારે તેને દબોચી લીધો છે. પોલીસ આજે તેને મુંબઈની કિલ્લા કોર્ટ (એસ્પ્લેનેડ કોર્ટ) માં રજૂ કરશે. આ કેસમાં અત્યાર સુધીમાં કુલ ૫ લોકોની ધરપકડ કરવામાં આવી છે, જ્યારે મુખ્ય શૂટર હજુ પણ ફરાર છે.

૩૦,૦૦૦ રૂપિયામાં ખરીદાયું હતું સ્કૂટર
પોલીસ તપાસમાં બહાર આવ્યું છે કે આ હુમલાનું આયોજન ખૂબ જ વ્યવસ્થિત રીતે કરવામાં આવ્યું હતું. ૩ ફેબ્રુઆરીએ પોલીસે ફાયરિંગમાં વપરાયેલા સ્કૂટરના માલિક સુધી પહોંચવામાં સફળતા મેળવી હતી. આરોપી આદિત્ય ગાયકીએ પુણેના એક વ્યક્તિ પાસેથી ૩૦,૦૦૦ રૂપિયામાં આ સ્કૂટર ખરીદ્યું હતું. આદિત્ય અને સમર્થ પોમાજી નામના આરોપીઓએ આ સ્કૂટરને જુહુ વિસ્તારમાં પૂર્વ નિર્ધારિત જગ્યાએ છોડી દીધું હતું. આશ્ચર્યની વાત એ છે કે સ્કૂટર લાવનારા અને હથિયાર આપનારા કોઈ પણ આરોપીને શૂટર કોણ છે તેની ખબર નહોતી. આ બધું જ માસ્ટરમાઇન્ડ શુભમ લોનકરના ઈશારે થઈ રહ્યું હતું.

લોરેન્સ બિશ્નોઈ ગેંગનું ‘સાઈલેન્ટ’ મોડસ ઓપરેન્ડી
આ ફાયરિંગની જવાબદારી કુખ્યાત લોરેન્સ બિશ્નોઈ ગેંગે સોશિયલ મીડિયા પોસ્ટ દ્વારા સ્વીકારી હતી. તપાસમાં બહાર આવ્યું છે કે આ ગેંગ નાના-નાના જૂથોમાં કામ કરે છે જેથી જો એક પકડાય તો બીજા વિશે કોઈ માહિતી ન મળે.