અયોધ્યાના ભવ્ય રામ મંદિરમાં તાજેતરમાં સામે આવેલા દાન ચોરીના વિવાદની શાહી હજુ સુકાઈ નથી, ત્યાં મંદિર વહીવટ સામે એક નવું મોટું સંકટ આવી પડ્યું છે. મંદિરમાં ભક્તો દ્વારા ચઢાવવામાં આવતા દાનની ગણતરીનું મહત્ત્વપૂર્ણ કામ સંભાળતા ૨૩ કર્મચારીઓએ એકસાથે સામૂહિક રાજીનામા ધરી દીધા છે. આ આકસ્મિક અને ચોંકાવનારા નિર્ણયને કારણે ગુરુવારે દાન ગણતરીના કેન્દ્ર પર માત્ર ૧૩ કર્મચારીઓ જ હાજર રહ્યા હતા, જેના લીધે રોજ કરોડો રૂપિયાના આવતા ચઢાવાની ગણતરીનું કામ ગંભીર રીતે પ્રભાવિત થયું છે. આ સામૂહિક રાજીનામાના પગલે શ્રી રામ જન્મભૂમિ તીર્થ ક્ષેત્ર ટ્રસ્ટ, સ્ટેટ બેંક ઓફ ઇન્ડિયા (SBI) અને સુરક્ષા એજન્સીઓમાં ભારે દોડધામ મચી ગઈ છે અને વહીવટી તંત્ર સફાળું જાગ્યું છે.

કામના કલાકોમાં વધારો અને પગાર ઘટાડો બન્યો વિવાદનું કારણ

રાજીનામું આપનારા કર્મચારીઓ વતી મીડિયા સમક્ષ વિગતો આપતા એક કર્મચારીએ જણાવ્યું કે, મંદિરમાં દાન ચોરીનો મામલો પ્રકાશમાં આવ્યા બાદ સુરક્ષા અને સાવચેતીના ભાગરૂપે ગણતરીની પ્રક્રિયામાં મોટા ફેરફારો કરવામાં આવ્યા હતા. આ અંતર્ગત અગાઉ ચાલતી બે શિફ્ટને બંધ કરીને માત્ર એક જ શિફ્ટ કરી દેવામાં આવી હતી. આ ફેરફારના કારણે કર્મચારીઓની ડ્યુટી જે પહેલા માત્ર ૬ કલાકની હતી, તે વધારીને સીધી ૯ કલાક (સવારે ૯ થી સાંજના ૬ વાગ્યા સુધી) કરી દેવાઈ હતી. કર્મચારીઓનો આરોપ છે કે કામના કલાકો વધારવા છતાં તેમની સુવિધાઓમાં ધરખમ ઘટાડો કરવામાં આવ્યો હતો.

કર્મચારીઓમાં સૌથી મોટો આક્રોશ અને અસંતોષ પગાર ઘટાડાને લઈને જોવા મળી રહ્યો છે. અગાઉ આ કામગીરીમાં જોડાયેલા તમામ કર્મચારીઓને માસિક ૧૪,૭૫૫ રૂપિયા ફિક્સ પગાર ચૂકવવામાં આવતો હતો. પરંતુ વહીવટી તંત્ર દ્વારા આ ફિક્સ પગારની વ્યવસ્થા નાબૂદ કરી, તેમાં મોટો ઘટાડો કરીને અલગ-અલગ સ્લેબ બનાવી દેવાયા હતા, જેમાં કોઈને ૮ હજાર તો કોઈને ૧૧ હજાર રૂપિયા જ આપવાનું નક્કી કરાયું હતું. આ ઉપરાંત, કર્મચારીઓને મહિના દરમિયાન મળતી નિયમિત રજાઓમાં પણ કાપ મૂકી દેવામાં આવતા તેમનો ધૈર્ય ખૂટ્યો હતો.

અધિકારીઓ સમક્ષ રજૂઆત નિષ્ફળ જતાં આકરો નિર્ણય

બુધવારે સાંજે કામના કલાકો પૂર્ણ થયા બાદ તમામ અસંતુષ્ટ કર્મચારીઓ એકઠા થયા હતા. તેમણે કામના કલાકો ઘટાડીને પૂર્વવત કરવા અને પગાર ધોરણ પણ પહેલા જેવું જ કરવાની માગ સાથે સ્ટેટ બેંક ઓફ ઇન્ડિયા (SBI)ની તુલસી ઉદ્યાન શાખાના ઉચ્ચ અધિકારીઓ તેમજ સૈનિક સિક્યોરિટીના સુપરવાઈઝર જયરામ યાદવ સમક્ષ ઉગ્ર રજૂઆત કરી હતી. જોકે, અધિકારીઓ દ્વારા કર્મચારીઓની આ વ્યાજબી માગણીઓનો સ્પષ્ટ અસ્વીકાર કરવામાં આવ્યો હતો. આનાથી ગુસ્સે ભરાયેલા ૨૩ કર્મચારીઓએ સ્થળ પર જ હસ્તાક્ષર યુક્ત સામૂહિક રાજીનામું સત્તાધિકારીઓને સોંપી દીધું હતું. ગુરુવારે સવારે જ્યારે એકપણ કર્મચારી કામ પર ન પહોંચ્યો ત્યારે બેંકથી લઈને રામ મંદિર ટ્રસ્ટ સુધીના તમામ વિભાગોમાં ભારે હડકંપ મચી ગયો હતો.

નવી ભરતીમાં સુરક્ષાના કડક નિયમો નડશે

બેંકના સત્તાવાર સૂત્રોના જણાવ્યા અનુસાર, ખાલી પડેલી જગ્યાઓ પર નવી ભરતી પ્રક્રિયા તાત્કાલિક ધોરણે શરૂ કરવાના પ્રયાસો હાથ ધરવામાં આવ્યા છે. જોકે, તાજેતરના દાન ચોરીના કૌભાંડને ધ્યાનમાં રાખીને હવે વહીવટી તંત્ર અત્યંત સાવધ બન્યું છે. હવે કોઈપણ નવા કર્મચારીને પૂરતા અને કડક પોલીસ વેરિફિકેશન (સત્યાપન) વગર કામ પર રાખવામાં આવશે નહીં, જેના કારણે નવી ભરતી પ્રક્રિયા પૂર્ણ થવામાં સારો એવો સમય લાગી શકે છે અને ત્યાં સુધી દાન ગણતરીની કામગીરી ધીમી રહેશે. બીજી તરફ, બેંકના એક ઉચ્ચ અધિકારીએ એવો પણ દાવો કર્યો છે કે કર્મચારીઓએ રાજીનામું નથી આપ્યું, પરંતુ સ્ટાફની જરૂરિયાત ઓછી હોવાથી તેમને વહીવટી પ્રક્રિયાના ભાગરૂપે હટાવવામાં આવ્યા છે.

ટ્રસ્ટના હોદ્દેદારોની બેઠકોનો દોર શરૂ

આ ગંભીર કટોકટીની વચ્ચે, શ્રી રામ જન્મભૂમિ તીર્થ ક્ષેત્ર ટ્રસ્ટના નવયુક્ત કાર્યવાહક મહામંત્રી કૃષ્ણ મોહને તાબડતોબ ટ્રસ્ટના અધ્યક્ષ મહંત નૃત્ય ગોપાલ દાસ સાથે મણિરામ છાવણી મંદિર ખાતે ખાસ મુલાકાત કરી હતી. જોકે સત્તાવાર રીતે એવું જાહેર કરાયું છે કે પદ સંભાળ્યા બાદ આ તેમની માત્ર એક શિષ્ટાચાર મુલાકાત હતી, પરંતુ મંદિરની અંદર બનેલી આ ઘટનાના ટાઈમિંગને જોતા, અંદાજે એક કલાક સુધી ચાલેલી આ બંધ બારણે બેઠકને આ સામૂહિક રાજીનામાના પ્રકરણ અને મંદિરની સુરક્ષા વ્યવસ્થા સાથે જોડીને જ જોવામાં આવી રહી છે. હાલમાં રામ મંદિર ટ્રસ્ટ આ વિવાદને વહેલી તકે ઉકેલવા માટે મથામણ કરી રહ્યું છે.