IAS ધર્મેન્દ્ર કુમારને દિલ્હીના નવા મુખ્ય સચિવ બનાવવામાં આવ્યા છે. તેઓ 1 સપ્ટેમ્બરથી ચાર્જ સંભાળશે. ધર્મેન્દ્ર કુમાર 1989 બેચના IAS અધિકારી છે જે હાલમાં અરુણાચલ પ્રદેશમાં પોસ્ટેડ છે.

દિલ્હીના મુખ્ય સચિવનું પદ સંભાળ્યા બાદ ધર્મેન્દ્ર કુમાર માટે સૌથી મોટો પડકાર ચૂંટાયેલી સરકાર, નોકરશાહી અને દિલ્હીના લેફ્ટનન્ટ ગવર્નર વચ્ચેના અંતરને પૂરવાનો હોઈ શકે છે. શાંત વર્તન માટે જાણીતા ધર્મેન્દ્ર માટે આ ઇમેજ જાળવી રાખવી મહત્વપૂર્ણ રહેશે. આગામી દિલ્હી વિધાનસભાની ચૂંટણીના થોડા મહિના પહેલા તેઓ પોતાની જવાબદારી સંભાળી રહ્યા છે જેના કારણે તેમની જવાબદારી વધુ મહત્વની બની ગઈ છે. ધર્મેન્દ્ર કુમારના અનુભવમાં NDMCના અધ્યક્ષ અને દિલ્હીના ભૂતપૂર્વ પર્યાવરણ સચિવ તરીકેનો તેમનો કાર્યકાળ સામેલ છે, જે તેમને શહેરના વહીવટી પડકારોમાં મૂલ્યવાન દિશા આપે છે.

મુખ્ય સચિવ સામે હશે અનેક પડકારો

ત્યારે શિયાળામાં દિલ્હીમાં ખતરનાક પ્રદૂષણ પણ તેમના માટે એક પડકાર હશે. તેમની તાત્કાલિક પ્રાથમિકતાઓમાંની એક અસરકારક પ્રદૂષણ નિયંત્રણ નિયમોની ખાતરી કરવાની રહેશે. આ ઉપરાંત દિલ્હીના રાજકીય માહોલ અને ચૂંટણી પ્રક્રિયાની જટિલતાઓને ઉકેલવામાં તેમની મહત્વની ભૂમિકા હશે.

નરેશ કુમારનું સ્થાન લેશે ધર્મેન્દ્ર કુમાર

જણાવી દઈએ કે, ધર્મેન્દ્ર કુમાર નરેશ કુમારનું સ્થાન લેશે, જેમને 30 નવેમ્બર, 2023ના રોજ નિવૃત્તિ પછી બે એક્સટેન્શન આપવામાં આવ્યું હતું. તેમને પહેલું એક્સટેન્શન છ મહિના માટે અને બીજું એક્સટેન્શન ત્રણ મહિના માટે મળ્યું.

નરેશ કુમાર 1987 બેચના IAS અધિકારી છે અને ભૂતપૂર્વ NDMC ચીફ કેન્દ્ર સરકાર અને LG VK સક્સેનાના નજીકના સહયોગી માનવામાં આવતા હતા. તેમના કાર્યકાળ દરમિયાન અનેક હાઈ-પ્રોફાઈલ તપાસ થઈ હતી, જેમાં દિલ્હી એક્સાઈઝ પોલીસીમાં કથિત અનિયમિતતાઓ અને મુખ્યમંત્રીના નિવાસસ્થાનના બાંધકામનો સમાવેશ થાય છે. તેમના શાસન દરમિયાન, અરવિંદ કેજરીવાલ અને મનીષ સિસોદિયા બંનેને જેલનો સામનો કરવો પડ્યો હતો, જેના કારણે તેમનો કાર્યકાળ ઘણો વિવાદાસ્પદ બન્યો હતો.

નરેશ કુમારનો કાર્યકાળ મહત્વની ઘટનાઓ માટે યાદ રાખવામાં આવશે, જેમ કે સેવાઓ પર સુપ્રીમ કોર્ટનો નિર્ણય અને ત્યારબાદ દિલ્હી સેવા અધિનિયમમાં સુધારો કરવા માટે સંસદમાં બિલ પસાર થવું. મુખ્ય સચિવ તરીકેનો તેમનો કાર્યકાળ આમ આદમી પાર્ટી (AAP) સરકાર સાથે સતત સંઘર્ષથી ભરેલો હતો.