સિહોર તાલુકાના સણોસરામાં રહેતી મહિલાને તેના જેઠ, જેઠાણી અને ભત્રીજા સહિતના ચાર શખ્સોએ માર મારી ગંભીર ઇંજા પહોંચાડી હતી. પોલીસે આ બનાવ અંગે ચાર આરોપી સામે ગુનો દાખલ કરી વધુ તપાસ હાથ ધરી હતી.
સણોસરા ગામે રહેતી ગીતાબહેન ધીરૂભાઈ પરમારએ જેઠ પરષોત્તમ પરમાર, જેઠાણી સવિતાબહેન, ભત્રીજો વિપુલ અને રાજુ સામે એવી ફરિયાદ નોંધાવી હતી કે  ફરિયાદી ઘરે હતા ત્યારે આરોપીઓએ ફળીયુ તારા એકલાનું નથી તેમ કહી વિપુલે ગાળો આપતાં ફરિયાદીએ તેના જેઠ અને જેઠાણીને બોલાવતા તમામ આરોપીઓએ ફરિયાદીને ગાળો આપી હતી.
ગાળો આપવાની ના કહેવામાં આવતાં વિપુલે લાકડીથી હુમલો કરી ફરિયાદીને તેમજ ફરિયાદીના પુત્ર ધર્મેશને માથામાં ઇંજા પહોંચાડી હતી અને તમામ આરોપીઓએ ફરિયાદી તેમજ સાહેદને માર મારી જાનથી મારી નાંખવાની ધમકી આપી હતી. ગીતાબેનની ફરિયાદ લઈ  પોલીસે આ બનાવ અંગે વધુ તપાસ હાથ ધરી હતી.