આરોપી ધર્મેશ રાણપરીયા સામે લેન્ડ ગ્રેબીંગ : મયુર ટાઉનશીપના કોમન પ્લોટમાં દબાણ-બાંધકામ કર્યુ

જામનગરના રણજીતસાગર રોડ પર આવેલ મયુરટાઉનશીપ-1 ખાતેનો કોમન પ્લોટમાં બાંધકામ થકી ગેરકાયદે દબાણ કરીને અંદાજે પાંચ કરોડની જમીન પચાવી પાડવાના મુદે જયેશ પટેલના ભાઇ ધર્મેશ રાણપરીયા સામે સીટી-એ ડીવીઝનમાં લેન્ડ ગ્રેબીંગ હેઠળ ગુનો દાખલ થતા ચકચાર વ્યાપી છે, ફરીયાદના આધારે પોલીસે આરોપીની અટકાયત કરી તપાસને આગળ ધપાવી છે.

જામનગર શહેરના રણજીતસાગર રોડ પર મયુરટાઉનશીપ-1 ખાતે રે.સ.નં. 1206નો કોમન પ્લોટ-એ આશરે 965.38 ચો.મી. જેની અંદાજે બજાર કિંમત ા. 5.19.55.000 નો કિંમતી પ્લોટમાં ગેરકાયદે દબાણ કરવામાં આવ્યું હોવાની ફરીયાદ-રજુઆત લેન્ડ ગ્રેબીંગ સમિતી સમક્ષ કરવામાં આવી હતી, દરમ્યાનમાં સમિતી દ્વારા આ અંગે તપાસ કરતા જેમાં તથ્ય જણાતા આ મામલે ફરીયાદ કરવા  પોલીસને સુચના કરવામાં આવી હતી.

દરમ્યાનમાં મયુરટાઉનશીપ શેરી નં. 9 ખાતે રહેતા ધર્મેશ મુળજી રાણપરીયાની વિરુઘ્ધ સીટી-એ ડીવીઝનમાં ધ ગુજરાત જમીન પચાવી પાડવા પર પ્રતિબંધ અધિનિયમ 2020ની કલમ 4(3), 5(ગ) અને ઇપીકો 506, 294(ખ) મુજબ ગુનો દાખલ કરવામાં આવ્યો છે.

આ કામના ફરીયાદી રઘુવીરપાર્ક સોસાયટીમાં રહેતા જગદીશ રમેશભાઇ રામોલીયાના મુળ પ્લોટ (મકાન)ની બાજુમાં આવેલ રે.સ.નં. 1206નો 5.19 કરોડની કિંમતનો કોમન પ્લોટ આરોપી ધર્મેશ રાણપરીયાએ પોતાના અંગત ઉપયોગ માટે મ, સંડાસ, બાજમ અને બે શેડ બનાવી ગેરકાયદે દબાણ કરી જમીન પચાવી પાડી ફરીયાદી અને સોસાયટીના રહીશોની સુવિધા છીનવી લઇ અપશબ્દો બોલી, ધમકીઓ આપી હતી.

પોલીસ ફરીયાદના આધારે આ અંગેની તપાસ જામનગર સીટી ડીવાયએસપી ઝાલા તથા સીટી-એ પીઆઇ એન.એ. ચાવડા દ્વારા હાથ ધરવામાં આવી છે, ગઇકાલે ફરીયાદ થતા પોલીસ દ્વારા આ અંગે તપાસના ચક્રો ગતીમાન કરવામાં આવ્યા હતા અને આરોપી ધર્મેશ રાણપરીયાની અટકાયત કરવામાં આવી છે.

અત્રે ઉલ્લેખનીય છે કે, ધર્મેશ રાણપરીયા સામે અગાઉ 3 ફરીયાદ થઇ ચુકી છે અને તાજેતરમાં જ રણજીતસાગર રોડ પર આરોપીએ કરેલ ગેરકાયદે બાંધકામ પોલીસ અને એસ્ટેટ શાખાની ટીમ દ્વારા બુલડોઝર ફેરવીને દુર કરી જગ્યા ખુલ્લી કરાઇ હતી, દરમ્યાન ધર્મેશ રાણપરીયા સામે લેન્ડ ગ્રેબીંગ હેઠળ ગુનો દાખલ થતા ચકચાર ફેલાઇ જવા પામી છે.