ભારતીય બેડમિન્ટન સ્ટાર પીવી સિંધુએ પોતાની નવી ઇનિંગની શરૂઆત કરી છે. તેણે ગઈકાલે ઉદયપુરમાં એક ભવ્ય સમારોહમાં વેંકટ દત્તા સાઈ સાથે લગ્ન કર્યા. આ પ્રસંગે બંનેએ પારંપારિક વસ્ત્રોમાં સજ્જ થયા હતા. આ પ્રસંગે  તેમના પરિવારજનો અને નજીકના લોકોએ ભાગ લીધો હતો.

ભારત માટે ઓલિમ્પિક મેડલ જીતનારી બેડમિન્ટન સ્ટાર પીવી સિંધુ લગ્નના બંધનમાં બંધાઈ ગઈ છે. સંગીત સમારોહ 20 ડિસેમ્બરે યોજાયો હતો અને બીજા દિવસે હલ્દી, પેલીકુથુરુ અને મહેંદીની વિધિ કરવામાં આવી હતી. લગ્ન પછી પણ ઉજવણી ચાલુ રહેશે કારણ કે 24મી ડિસેમ્બરે હૈદરાબાદમાં રિસેપ્શન પાર્ટીનું આયોજન કરવામાં આવશે.

સિંધુના પતિ વેંકટ દત્તા સાઈ ફાઉન્ડેશન ઓફ લિબરલ એન્ડ મેનેજમેન્ટ એજ્યુકેશનમાંથી લિબરલ આર્ટસ એન્ડ સાયન્સ/લિબરલ સ્ટડીઝમાં ડિગ્રી ધરાવે છે. 2018 માં, તેણે ફ્લેમ યુનિવર્સિટીમાંથી એકાઉન્ટિંગ અને ફાઇનાન્સમાં બીબીએ કર્યું. ઈન્ટરનેશનલ ઈન્સ્ટિટ્યૂટ ઓફ ઈન્ફોર્મેશન ટેકનોલોજી, બેંગલુરુમાંથી ડેટા સાયન્સ અને મશીન લર્નિંગમાં માસ્ટર ડિગ્રી પ્રાપ્ત કરી. હાલમાં તેઓ પોસાઇડેક્સ ટેક્નોલોજીસમાં એક્ઝિક્યુટિવ ડિરેક્ટર તરીકે કામ કરી રહ્યા છે.

જોધપુરના પર્યટન અને સંસ્કૃતિ મંત્રી ગજેન્દ્ર સિંહ શેખાવતે આ કાર્યક્રમમાં હાજરી આપી હતી અને તેમણે એક્સ પર એક ફોટો અપલોડ કર્યો હતો. જેમાં તેમણે લખ્યું કે ગઈકાલે સાંજે ઉદયપુરમાં આપણી બેડમિન્ટન ચેમ્પિયન ઓલિમ્પિયન પીવી સિંધુ અને વેંકટ દત્તા સાઈના લગ્નમાં હાજરી આપીને ઘણો આનંદ થયો. મેં આ દંપતીને તેમના નવા જીવન માટે મારી શુભેચ્છાઓ અને આશીર્વાદ આપ્યા.