બે દિવસ પહેલા બંગાળની ખાડીમાં સાઉથવેસ્ટ દિશામાં સર્જાયેલું લો પ્રેશર આજે સવારે 5:30 વાગે આ એરિયામાં જ ડીપ ડિપ્રેશનમાં પરિવર્તિત થઈ ગયું છે અને તે પ્રતિ કલાકના 15 કીલોમીટરની ઝડપે વેસ્ટ નોર્થ વેસ્ટ તરફ આગળ વધી રહ્યું છે. બંગાળની ખાડીમાં હિન્દ મહાસાગરને સંલગ્ન એરિયામાં સર્જાયેલી આ સિસ્ટમના કારણે તમિલનાડુ કેરલા લક્ષદ્વીપ અને નિકોબારમાં ભારેથી અતિ ભારે વરસાદની ચેતવણી આપવામાં આવી છે.

હવામાન વિભાગ દ્વારા આ સંદર્ભે ખાસ બુલેટિન જાહેર કરવામાં આવ્યું છે અને તેમાં જણાવયા મુજબ બંગાળની ખાડીની આ સિસ્ટમના કારણે આવતીકાલથી 11 તારીખ સુધી તમિલનાડુ કેરલા લક્ષદ્વીપ નિકોબારમાં ભારેથી અતિ ભારે વરસાદની શક્યતા છે. દરિયો તોફાની હોવાના કારણે માછીમારોને દરિયામાં ન જવા માટે ચેતવણી આપવામાં આવી છે. પ્રતિ કલાકના 50 થી 60 કિલોમીટરની ઝડપે પવન ફુકાશે અને અમુક તબક્કે તેની ઝડપ વધીને 70 કીલોમીટર સુધી પહોંચી જશે.

આજે સવારના 8:30 વાગ્યાના બુલેટિનમાં ઇન્ડિયન મેટ્રોલોજીકલ ડિપાર્ટમેન્ટે જણાવ્યું છે કે આ સિસ્ટમ અત્યારે પુડીચેરીના કરાઈકાલથી 860 કિલોમીટર અને તામિલનાડુના ચેન્નાઈથી 1020 કિલોમીટર દૂર છે. શ્રીલંકાના દરિયાથી તે નજીક છે અને કાલે સાંજે તે શ્રીલંકાના હબનટોટા અને કાલમુનાઈ વચ્ચે ત્રાટકશે.