દેશમાં આઈપીએલનો ફીવર ચડવા જઈ રહ્યો છે ત્યારે ગેરકાયદેસર ઓનલાઇન સટ્ટાબાજી અને જુગારની પ્રવૃત્તિઓ પર લગામ લગાવવા માટે સરકારે મોટું પગલું ભર્યું છે. નિયમોના ઉલ્લંઘન બદલ અંદાજે 300 જેટલી વેબસાઇટ્સ અને મોબાઈલ એપ્સને તાત્કાલિક અસરથી બ્લોક કરી દેવામાં આવી છે. ઓનલાઇન ગેમિંગ સેક્ટરમાં વધી રહેલી અનિયમિતતાઓ અને નાણાકીય છેતરપિંડીને રોકવા માટે આ કડક કાર્યવાહી કરવામાં આવી છે.

કયા પ્રકારના પ્લેટફોર્મ્સ પર ગાજ પડી?
સરકારી સૂત્રોના જણાવ્યા અનુસાર આ કાર્યવાહીમાં મુખ્યત્વે ત્રણ પ્રકારના પ્લેટફોર્મ્સને નિશાન બનાવવામાં આવ્યા છે:

સ્પોર્ટ્સ બેટિંગ સાઇટ્સ: ક્રિકેટ, ફૂટબોલ અને અન્ય રમતો પર સટ્ટો રમાડતી વિદેશી અને સ્થાનિક સાઇટ્સ.

ડિજિટલ કસીનો: સ્લોટ, રુલેટ અને લાઈવ ડીલર જેવા ગેમ્સ દ્વારા લોકો પાસેથી પૈસા પડાવતા પ્લેટફોર્મ્સ.

ગેરકાયદેસર નેટવર્ક: સટ્ટા-મટકા નેટવર્ક અને પીયર-ટુ-પીયર (P2P) બેટિંગ પ્લેટફોર્મ્સ, જે મની લોન્ડરિંગના જોખમો ઊભા કરતા હતા.

8,400 પ્લેટફોર્મ્સ બંધ
રિપોર્ટ મુજબ સરકાર અત્યાર સુધીમાં કુલ 8,400 થી વધુ ગેરકાયદેસર વેબસાઇટ્સ અને એપ્સને બ્લોક કરી ચૂકી છે. નોંધપાત્ર બાબત એ છે કે, જે દિવસે ઓનલાઇન ગેમિંગના નવા કડક કાયદાઓ લાગુ થયા, ત્યારથી અત્યાર સુધીમાં અંદાજે 4,900 પ્લેટફોર્મ્સ હટાવી દેવામાં આવ્યા છે. આ આંકડા દર્શાવે છે કે સરકાર આ ક્ષેત્રમાં શૂન્ય સહિષ્ણુતા (Zero Tolerance) ની નીતિ અપનાવી રહી છે.

શા માટે આ કડક વલણ જરૂરી હતું?
ઓનલાઇન સટ્ટાબાજીના વધતા ચલણને કારણે મધ્યમ અને ગરીબ વર્ગના યુવાનોમાં આર્થિક બરબાદીનું જોખમ વધી રહ્યું હતું.

નાણાકીય છેતરપિંડી: ઘણી એપ્સ લોકોના પૈસા જીત્યા પછી પરત આપતી ન હતી.

ડેટા સુરક્ષા: ગેરકાયદેસર એપ્સ યુઝર્સની અંગત વિગતો અને બેંકિંગ ડેટાની ચોરી કરતી હોવાના કિસ્સા સામે આવ્યા હતા.

​​​​​​​ગેરમાર્ગે દોરતી જાહેરાતો: સોશિયલ મીડિયા પર સેલિબ્રિટીઝ દ્વારા આ એપ્સનું પ્રમોશન કરીને લોકોને લલચાવવામાં આવતા હતા.

સરકારે સ્પષ્ટ સંકેત આપ્યો છે કે ગેરકાયદેસર ઓનલાઇન પ્રવૃત્તિઓ સામેનું આ અભિયાન હજુ અટકશે નહીં. આઈટી મંત્રાલય સતત નવી વેબસાઇટ્સ પર નજર રાખી રહ્યું છે. ગ્રાહકોને પણ સલાહ આપવામાં આવી છે કે તેઓ માત્ર સરકાર માન્ય અને રજિસ્ટર્ડ ગેમિંગ પ્લેટફોર્મ્સનો જ ઉપયોગ કરે, જેથી તેમની મહેનતની કમાણી અને ડેટા સુરક્ષિત રહે.