ગુજરાત સરકારના ગૃહ વિભાગ દ્વારા રાજ્યના વહીવટી માળખામાં એક મહત્વનો ફેરફાર કરતા નિવૃત્ત આઈપીએસ અધિકારીને નવી જવાબદારી સોંપવામાં આવી છે. સરકારના તાજેતરના જાહેરનામા અનુસાર, ૧૯૮૯ બેચના નિવૃત્ત આઈપીએસ (IPS) અધિકારી અને રાજ્યના પૂર્વ DGP વિકાસ સહાયને 'અમદાવાદ પોલીસ એન્ડ ફાયર ગેમ્સ ઓર્ગેનાઈઝેશન'ના ચીફ એક્ઝિક્યુટિવ ઓફિસર (CEO) તરીકે નિયુક્ત કરવામાં આવ્યા છે.

સરકાર દ્વારા સત્તાવાર જાહેરનામું પ્રસિદ્ધ

ગૃહ વિભાગના પ્રિન્સિપલ સેક્રેટરી સંજીવ કુમારના આદેશથી આજે ૩૦ માર્ચ, ૨૦૨૬ના રોજ આ અંગેનું સત્તાવાર નોટિફિકેશન બહાર પાડવામાં આવ્યું છે. આ નિમણૂક વિકાસ સહાય જે તારીખથી પોતાનો ચાર્જ સંભાળશે તે દિવસથી અમલી બનશે. જોકે, તેમની આ નિમણૂક માટેના સેવાકીય નિયમો અને શરતો સરકાર દ્વારા આગામી સમયમાં અલગથી જાહેર કરવામાં આવશે.

વિકાસ સહાયનો અનુભવ અને નવી જવાબદારી

વિકાસ સહાય ૧૯૮૯ બેચના અનુભવી અધિકારી રહ્યા છે. તેમની આ નિમણૂક પાછળ રમતગમત અને પોલીસ દળના શિસ્તબદ્ધ આયોજનનો તેમનો બહોળો અનુભવ કામ કરી શકે છે. અમદાવાદમાં યોજાનારી પોલીસ અને ફાયર વિભાગની રમતગમત પ્રવૃત્તિઓના સુચારુ સંચાલન અને સંગઠનને વેગ આપવા માટે આ નિમણૂક અત્યંત મહત્વની માનવામાં આવે છે.

વિવિધ વિભાગોને જાણ કરાઈ

આ નિમણૂકની નકલ રાજ્યના રાજ્યપાલના અગ્ર સચિવ, મુખ્યમંત્રીના અગ્ર સચિવ, રમતગમત મંત્રી, પોલીસ મહાનિદેશક (DGP) અને અમદાવાદ મ્યુનિસિપલ કમિશનર સહિતના તમામ સંબંધિત વિભાગોને રવાના કરવામાં આવી છે. આ નિમણૂકથી પોલીસ અને ફાયર વિભાગના ખેલાડીઓમાં ઉત્સાહ જોવા મળી રહ્યો છે અને આગામી સમયમાં મોટા સ્તરે રમતગમત મહોત્સવના આયોજનની શક્યતાઓ સેવાઈ રહી છે.