થર્ટી ફર્સ્ટના ચેકિંગ દરમિયાન શહેરના રૈયા ચોકડી પાસે કારચાલક અને પીએસઆઇ વચ્ચે બોલાચાલી થયા બાદ બંને વચ્ચે ઝપાઝપી થઈ હતી. હજુ આ ઘટના ભુલાઈ નથી ત્યાં રૈયા રોડ પર વધુ એક આવી ઘટના સામે આવી છે. જેમાં નંબર પ્લેટ વગરની કાર પોલીસે રોકતા કારમાં સવાર મહિલા અને કાર રોકનાર મહિલા પોલીસ કર્મી વચ્ચે ઉગ્ર બોલાચાલી થઈ હતી. જાહેરમાં જ બંને વચ્ચે તું મેં મેં થઈ જતા અહીં ભારે ટ્રાફિકજામ થઈ ગયો હતો. કારમાં નંબર પ્લેટ ન હોય તે બાબતે કાર અટકાવ્યા બાદ બંને વચ્ચે બોલાચાલી થઈ હતી. જેમાં વીડિયોમાં દ્રશ્યમાન થયા મુજબ કારમાં સવાર મહિલા પોલીસને તુંકારો આપવા બાબતે તેની સાથે બોલાચાલી કરી રહી હતી તો સામેપક્ષે પોલીસ દ્વારા નિયમનું પાલન કરાવવામાં આવતા તેઓએ આ ઘર્ષણ કર્યું હોવાનું જણાવવામાં આવી રહ્યું છે.