આધુનિક જીવનશૈલીમાં ફિટ રહેવા અને વજન ઉતારવા માટે લોકો કલાકો સુધી જીમમાં પરસેવો પાડે છે. આમ છતાં, ઘણા કિસ્સાઓમાં સખત મહેનત પછી પણ વજનનો કાંટો એક જ જગ્યાએ સ્થિર રહે છે, જે નિરાશા પેદા કરે છે. આરોગ્ય નિષ્ણાતોના મતે, વજન ઘટાડવું એ માત્ર શારીરિક શ્રમ પર નિર્ભર નથી, પરંતુ તેની પાછળ ચયાપચયની ક્રિયા (મેટાબોલિઝમ), આહાર અને દૈનિક આદતો જેવા અનેક પરિબળો કામ કરે છે. જો તમે પણ આ સમસ્યાનો સામનો કરી રહ્યા હોવ, તો ફિટનેસના લક્ષ્યોને પ્રાપ્ત કરવા માટે નિષ્ણાતોએ નીચે મુજબના ૩ વૈજ્ઞાનિક અને અસરકારક રસ્તાઓ સૂચવ્યા છે

આહાર શુદ્ધિ અને કેલરીનું સંતુલન 
વજન નિયંત્રણનો સૌથી પાયાનો નિયમ 'કેલરી ડેફિસિટ' છે. એટલે કે, તમે દિવસ દરમિયાન કસરત દ્વારા જેટલી ઊર્જા (કેલરી) બાળો છો, તેના કરતાં ઓછી કેલરી ખોરાક દ્વારા લો. સામાન્ય રીતે લોકો કસરત કર્યા પછી મનપસંદ જંક ફૂડ કે ગળ્યા પીણાં આરોગવાની ભૂલ કરે છે, જે આખી મહેનત પર પાણી ફેરવી દે છે. આથી, મેંદાની વસ્તુઓ અને ખાંડથી અંતર જાળવીને ડાયેટમાં પ્રોટીન, ફાઈબર અને લીલા શાકભાજીનું પ્રમાણ વધારવું અનિવાર્ય છે.

માનસિક તણાવ મુક્તિ અને પૂરતી ઊંઘ
ઓછી ઊંઘ અને અતિશય માનસિક સ્ટ્રેસ વજન ન ઘટવા પાછળના મુખ્ય અદ્રશ્ય વિલન છે. જ્યારે શરીરને ૭ થી ૮ કલાકની ગાઢ ઊંઘ નથી મળતી, ત્યારે મેટાબોલિઝમ ધીમું પડી જાય છે. આ ઉપરાંત, તણાવના કારણે શરીરમાં 'કોર્ટિસોલ' નામના હોર્મોનનું સ્તર વધે છે, જે પેટની આસપાસ જિદ્દી ચરબી (બેલી ફેટ) જમા કરે છે. ફિટનેસનો સંપૂર્ણ લાભ લેવા માટે સમયસર સૂવું અને યોગ દ્વારા મનને શાંત રાખવું જરૂરી છે.​​​​​​​

કસરતની શૈલીમાં બદલાવ 
મહિનાઓ સુધી એક જ પ્રકારની કસરત જેમ કે માત્ર દોડવું કે કાર્ડિયો કરવાથી શરીર તેની ટેવાઈ જાય છે, જેને ફિટનેસની ભાષામાં 'વેટ લોસ પ્લેટો' કહે છે. આ સ્થિતિમાંથી બહાર આવવા માટે વર્કઆઉટ રૂટિન બદલવું જરૂરી છે. કાર્ડિયોની સાથે 'સ્ટ્રેન્થ ટ્રેનિંગ' (વજન ઊંચકવું) અને 'હાઈ-ઇન્ટેન્સિટી ઇન્ટરવલ ટ્રેનિંગ' (HIIT) નો સમાવેશ કરવો જોઈએ. વધુમાં, અઠવાડિયામાં મળતા 'ચીટ ડે' પર અતિશય ખાવાની આદતથી બચવું જોઈએ.આ ૩ સરળ આદતોને દૈનિક જીવનમાં વણી લઈને કોઈપણ વ્યક્તિ જીમમાં વિતાવેલા સમયનું યોગ્ય પરિણામ મેળવી શકે છે અને આકર્ષક ફિગર પ્રાપ્ત કરી શકે છે.