ભાવનગર મહાપાલિકાના એસ્ટેટ વિભાગ અને દબાણ હટાવ સેલની ટીમ દ્વારા ગઈકાલે શહેરના વિવિધ વિસ્તારોમાંથી દબાણો હટાવી માલ સામાન જપ્ત કરાયા બાદ તંત્રએ આજે બીજા દિવસે પણ દબાણ હટાવ અભિયાન જારી રાખ્યું હતું. જેમાં આજે મહાપાલિકાના એસ્ટેટ વિભાગ અને દબાણ હટાવ સેલની ટીમ દ્વારા શહેરના  રબ્બર ફેક્ટરી સર્કલથી નવાપરા પોલીસ અધિક્ષકની કચેરી સુધીના રોડ પર પુન: થયેલા નાના-મોટા દબાણો સામે કાર્યવાહી હાથ ધરાઈ હતી. જેમાં રોડ પર અડચણ અસ્થાઈ દબાણો હરાવી લઈ માલસામાન જપ્ત કરાતા દબાણકર્તાઓમાં દોડધામ મચી હતી. એસ્ટેટ વિભાગ અને દબાણ હટાવ સેલ દ્વારા હાથ ધરાયેલી કાર્યવાહી દરમ્યાન નડતરરૂપ રખાયેલા વાહનોને લોક ઠપકારી દંડ વસુલવાની કામગીરી પણ કરવામાં આવી હતી. નોંધનીય છે જ શહેરના ગીચ અને સતત ટ્રાફિક ધરાવતા નવાપરા વિસ્તારમાં જુના વાહનોની લેવેચ કરતા દુકાનદારો દ્વારા જાહેરરોડ પર વાહનો રખાતા હોવાની તેમજ આ વિસ્તારમાં આવેલા ગેરેજમાં રીપેરીંગ માટે આવેલા વાહનો પણ રોડ પર મૂકી રાખવામાં આવતા હોવાની રજુઆતના પગલે મહાપાલિકા તંત્ર દ્વારા કાર્યવાહી હાથ ધરવામાં આવી હતી. પરંતુ તંત્રની કાર્યવાહી બાદ આ વિસ્તારમાં પુન: દબાણ થઈ જતાં હોવાનું સ્થાનિક રહીશો અને વેપારીઓ દ્વારા જણાવાયું હતું.