છત્તીસગઢમાં પ્રવર્તમાન દારૂ કૌભાંડની તપાસના ભાગરૂપે ઇન્ફોર્સમેન્ટ ડિરેક્ટોરેટ (ED) દ્વારા સોમવારે કોંગ્રેસના નેતા અને રાજ્યના પૂર્વ મુખ્યમંત્રી ભુપેશ બઘેલ, તેમના પુત્ર અને અન્ય સંબંધિત વ્યક્તિઓના નિવાસસ્થાન પર રેડ કરવામાં આવી. આ દરોડા દરમિયાન EDની ટીમ પર હુમલો કરવામાં આવ્યો હતો. રેડ પુરી થયા બાદ જ્યારે ટીમ ઘર બહાર નીકળી રહી હતી ત્યારે લોકો દ્વારા હુમલો કરવામાં આવ્યો.

EDના જણાવ્યા મુજબ હુમલા સામે એજન્સી FIR નોંધાવશે. તપાસ દરમિયાન બઘેલના ઘરમાંથી અંદાજે 33 લાખ રૂપિયાની રોકડ, પેન ડ્રાઈવ અને કેટલાક મહત્વના દસ્તાવેજો મળી આવ્યા છે, જેની તપાસ હાલ ચાલી રહી છે. 11 કલાકની લાંબી પૂછપરછ પછી EDની ટીમ પૂર્વ CM ભુપેશ બઘેલના નિવાસથી બહાર નીકળી. આ દરમિયાન EDના ડેપ્યુટી ડિરેક્ટર લેવલના અધિકારીની કાર પર પણ હુમલો થયો હતો.

EDના દરોડા બાદ ભિલાઈમાં ભુપેશ બઘેલના ઘરની બહાર કોંગ્રેસના અનેક નેતાઓ અને કાર્યકરો ભેગા થયા હતા અને આ સમગ્ર ઘટનાને કેન્દ્ર સરકારની સાડયંત્ર ગણાવી. આ પહેલા ED દ્વારા એવો દાવો કરવામાં આવ્યો હતો કે આ દારૂ કૌભાંડના કારણે રાજ્યના રાજસ્વને ભારે નુકસાન થયું છે અને 2100 કરોડ રૂપિયાથી વધુની રકમ દારૂ સિન્ડિકેટના લાભાર્થીઓ સુધી પહોંચી હતી.

કૉંગ્રેસે ભુપેશ બઘેલ સામે કરવામાં આવેલા દરોડાને લઈને આક્રોશ વ્યક્ત કર્યો છે. પાર્ટીનું કહેવું છે કે સંસદના બજેટ સત્રના બીજા તબક્કા દરમિયાન સરકારના સામેના મહત્વના મુદ્દાઓથી જનતાનું ધ્યાન ભટકાવવા માટે આ કાર્યવાહી કરવામાં આવી છે.

ભુપેશ બઘેલે પણ આ મુદ્દે પ્રતિક્રિયા આપતા કહ્યું કે, "હું મોતથી ડરતો નથી." તેઓએ આ દરોડાને રાજકીય પ્રેરિત કાવતરું ગણાવ્યું છે અને ભાજપ સરકાર પર નિશાન સાધ્યું છે.