રાજકોટ મહાનગરપાલિકા (RMC) દ્વારા શહેરના વિકાસ આડે અવરોધરૂપ બનતા ગેરકાયદેસર બાંધકામો અને દબાણો વિરુદ્ધની ઝુંબેશને વધુ તેજ બનાવવામાં આવી છે. જંગલેશ્વર વિસ્તારમાં તાજેતરમાં કરવામાં આવેલા મેગા ડિમોલિશન બાદ, આજે મનપાના ટાઉન પ્લાનિંગ વિભાગે ભીમનગર ચોક નજીક આક્રમક કાર્યવાહી હાથ ધરી હતી. વર્ષોથી દબાણોના કારણે બંધ પડેલા 200 મીટરના ટીપી રોડ પરથી 33 જેટલા ગેરકાયદે બાંધકામો તોડી પાડી રસ્તો ખુલ્લો કરવામાં આવ્યો છે.

દબાણોના કારણે સાંકડો બનેલો રસ્તો હવે થશે પહોળો

મળતી માહિતી મુજબ, ભીમનગર નજીક ટાઉન પ્લાનિંગ સ્કીમના 200 મીટરના મહત્વના રોડ પર લાંબા સમયથી કાચા-પાકા મકાનો અને દુકાનો ખડકાયેલી હતી. આ ગેરકાયદે બાંધકામોના કારણે રસ્તો અત્યંત સાંકડો થઈ ગયો હતો, જેના પરિણામે સ્થાનિક રહીશો અને વાહનચાલકોને ભારે ટ્રાફિક સમસ્યાનો સામનો કરવો પડતો હતો. મનપા કમિશનરના કડક નિર્દેશ બાદ આજે સવારથી જ ટાઉન પ્લાનિંગ વિભાગનો કાફલો બુલડોઝર અને જેસીબી મશીનો સાથે ભીમનગર પહોંચી ગયો હતો. કોઈ અનિચ્છનીય બનાવ ન બને તે માટે પોલીસ, વિજીલન્સ શાખા અને ફાયર વિભાગની ટીમોને ચુસ્ત બંદોબસ્ત સાથે તૈનાત કરવામાં આવી હતી.

નોનવેજના વેચાણવાળા દબાણો પર પણ ત્રાટક્યું તંત્ર

આ ડિમોલિશન કામગીરી દરમિયાન રહેણાંક અને વ્યાવસાયિક હેતુ માટે બનાવાયેલા 33 જેટલા યુનિટોને જમીનદોસ્ત કરવામાં આવ્યા હતા. આશ્ચર્યજનક વાત એ છે કે, આ વિસ્તારમાં રોડ પર જ અનેક દબાણો એવા હતા જ્યાં જાહેરમાં નોનવેજનું વેચાણ કરવામાં આવતું હતું. આ પ્રવૃત્તિને કારણે આસપાસના રહીશોમાં લાંબા સમયથી નારાજગી હતી. તંત્રએ આજે પૂર્વગ્રહ રાખ્યા વિના રસ્તામાં નડતરરૂપ તમામ પ્રકારના દબાણો દૂર કર્યા હતા, જેનાથી સ્થાનિક લોકોએ રાહતનો શ્વાસ લીધો છે.

હજારો નાગરિકોને ટ્રાફિકમાંથી મળશે મુક્તિ

ટીપીઓ (TPO) આર. ડી. પરમારે આ કામગીરી અંગે વિગતો આપતા જણાવ્યું કે, "રાજકોટને દબાણમુક્ત કરવાની નેમ સાથે આજે ભીમનગર વિસ્તારમાં 200 મીટરના રોડને ખુલ્લો કરવામાં આવ્યો છે. આગામી સમયમાં આ માર્ગને પહોળો અને આધુનિક બનાવવાની યોજના છે." આ રોડ ખુલ્લો થવાથી માત્ર ભીમનગર જ નહીં, પરંતુ નાનામૌવા અને મોટામૌવા જેવા વિસ્તારોમાં વસતા હજારો નાગરિકોને સીધો ફાયદો થશે. આ મુખ્ય વિસ્તારોમાં ટ્રાફિકનું ભારણ નોંધપાત્ર રીતે ઘટશે અને પરિવહન સરળ બનશે.

દબાણકર્તાઓમાં ફફડાટ: ‘ઝીરો ટોલરન્સ’ની નીતિ

રાજકોટ મનપા દ્વારા છેલ્લા કેટલાક સમયથી સરકારી જમીનો અને ટીપી રોડ પર થયેલા દબાણો હટાવવા માટે 'ઝીરો ટોલરન્સ'ની નીતિ અપનાવવામાં આવી છે. શહેરના વિકાસમાં અવરોધરૂપ બનતા કોઈપણ ગેરકાયદે બાંધકામને છોડવામાં આવશે નહીં તેવો સ્પષ્ટ સંકેત તંત્રએ આપ્યો છે. ભીમનગરની આ સફળ કામગીરી બાદ હવે અન્ય વિસ્તારોમાં પણ સર્વે શરૂ કરવામાં આવ્યો છે. આગામી દિવસોમાં શહેરના અન્ય ભાગોમાં પણ મનપાનું બુલડોઝર ફરી વળે તેવી શક્યતાને પગલે દબાણકર્તાઓમાં ભારે ફફડાટ વ્યાપી ગયો છે.