અમદાવાદના વસ્ત્રાલ ગામની સીમમાં આવેલી એક ફટાકડાની ફેક્ટરીમાં ગઈકાલે ૧૮ જુલાઈના રોજ એક અત્યંત ભયાનક અને કમકમાટીભર્યો બ્લાસ્ટ થયો હતો. આ પ્રચંડ વિસ્ફોટના કારણે સમગ્ર વિસ્તાર ધ્રુજી ઉઠ્યો હતો અને ઘટનાસ્થળે અફરાતફરી મચી ગઈ હતી. આ ભયાનક દુર્ઘટનામાં કુલ ૯ નિર્દોષ લોકોના કમકમાટીભર્યા મોત નીપજ્યા છે, જ્યારે અન્ય ૬ લોકો ગંભીર રીતે ઇજાગ્રસ્ત થયા છે. ઇજાગ્રસ્તોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા છે, જ્યાં તેમની સ્થિતિ નાજુક હોવાનું જાણવા મળ્યું છે. આ હૃદયદ્રાવક ઘટનાને પગલે સ્થાનિક વહીવટી તંત્ર અને પોલીસ કાફલો તાબડતોડ ઘટનાસ્થળે દોડી ગયો હતો.

ગેરકાયદેસર ફેક્ટરી અને ગુનાહિત કાવતરું

પોલીસની પ્રાથમિક તપાસમાં બહાર આવ્યું છે કે, આ ઘાતક દુર્ઘટના પાછળ ફેક્ટરી સંચાલકોની ઘોર બેદરકારી અને કાયદાનું ઉલ્લંઘન જવાબદાર છે. 'ન્યૂ ગુજરાત ફાયર વર્ક્સ' નામનું આ કારખાનું કોઈપણ પ્રકારની સરકારી પાસ કે પરમિટ વિના ગેરકાયદેસર રીતે ચલાવવામાં આવી રહ્યું હતું. સંચાલકો દ્વારા માત્ર પોતાના આર્થિક લાભ ખાટવા માટે સુરક્ષાના તમામ નિયમોને નેવે મૂકી દેવામાં આવ્યા હતા. માનવ જિંદગીને જોખમમાં મૂકીને, સુરક્ષાના પૂરતા સાધનો રાખ્યા વિના આ ગંભીર ગુનાહિત કાવતરું રચવામાં આવ્યું હતું, જેના પરિણામે ક્ષણભરમાં જ ૯ લોકોએ પોતાના જીવ ગુમાવવાનો વારો આવ્યો છે.

આરોપીઓ સામે પોલીસ ફરિયાદ

આ ગંભીર અને સંવેદનશીલ મામલાને ધ્યાને લઈને રામોલ પોલીસ સ્ટેશનમાં કાયદેસરનો ગુનો દાખલ કરવામાં આવ્યો છે. પોલીસ ફરિયાદની વિગતો અનુસાર, આરોપીઓ વસ્ત્રાલ સર્વે નં. ૬૨૯/૧/૨/૩ વાળી જગ્યા ભાડે રાખીને લાંબા સમયથી ગેરકાયદેસર રીતે ફટાકડા બનાવવાનું જોખમી એકમ ચલાવતા હતા. આ બ્લાસ્ટ મામલે નોંધાયેલી એફઆઈઆર (FIR) માં મુખ્ય આરોપી તરીકે મેહુલ ડોડીયા, તેમની માતા અને કારખાનાના મુખ્ય સંચાલક રમીલાબેન ડોડીયા તેમજ કારખાનાના ભાગીદાર સાદીક સૈયદના નામ જોગ ગુનો નોંધવામાં આવ્યો છે. આ ઉપરાંત, પોલીસ તપાસ દરમિયાન સામે આવનારા અન્ય તમામ જવાબદાર વ્યક્તિઓ સામે પણ કડક કાર્યવાહી કરવાનો ફરિયાદમાં સ્પષ્ટ ઉલ્લેખ કરાયો છે.

કાયદાકીય કલમો હેઠળ કડક કાર્યવાહી

રામોલ પોલીસે કાયદાનો સકંજો કસતા પકડાયેલા અને ફરાર આરોપીઓ સામે ભારતીય ન્યાય સંહિતા (BNS) અને વિસ્ફોટક કાયદાની ગંભીર કલમો હેઠળ ગુનો નોંધ્યો છે. પોલીસે આરોપીઓ વિરૂદ્ધ BNSની કલમ ૧૦૫, ૨૮૭, ૨૮૮ અને ૬૧(૨) હેઠળ ગુનો દાખલ કર્યો છે. આ સાથે જ, રહેણાંક અને ગ્રામ્ય વિસ્તારમાં ગેરકાયદે વિસ્ફોટકોના સંગ્રહ તથા તેના જોખમી ઉપયોગ બદલ વિસ્ફોટક પદાર્થ અધિનિયમ-૧૯૦૮ની કલમ ૫(એ) અને ૬ તેમજ વિસ્ફોટક અધિનિયમ-૧૮૮૪ની કલમ ૯(બી) હેઠળ પણ આકરી કાયદેસરની કાર્યવાહી હાથ ધરી છે.

પોલીસની ઊંડી તપાસ ચાલુ

હાલમાં રામોલ પોલીસની જુદી જુદી ટીમો દ્વારા સમગ્ર ઘટનાસ્થળની ઝીણવટભરી તપાસ કરવામાં આવી રહી છે. એફએસએલ (FSL) ની મદદ લઈને ઘટનાસ્થળેથી ગેરકાયદેસર ફેક્ટરી અને વિસ્ફોટકો અંગેના વધુ વૈજ્ઞાનિક પુરાવા એકત્ર કરવાની કામગીરી પણ ચાલી રહી છે. સ્થાનિક રહીશોમાં આ ઘટનાને પગલે ભારે રોષ જોવા મળી રહ્યો છે, ત્યારે પોલીસ તંત્ર દ્વારા આ મામલે તટસ્થ અને કડક તપાસ કરીને તમામ દોષિતોને જેલના સળિયા પાછળ ધકેલવા ચક્રો ગતિમાન કરવામાં આવ્યા છે.
​​​​​​​

View this post on Instagram

A post shared by Aajkaal (@aajkaaldaily)