ક્રિકેટના દિવાનાઓ માટે આગામી જૂન મહિનો રોમાંચ અને ઉત્સાહની બેવડી બોનાન્ઝા લઈને આવી રહ્યો છે. જો તમે પણ એવું વિચારી રહ્યા હોવ કે આઈપીએલ (IPL) પૂરી થયા પછી ક્રિકેટ વિના દિવસો કેમ જશે, તો ચિંતા છોડી દો. ભારતીય ક્રિકેટ ટીમ (Team India) આવતા મહિનાથી એક એવા મિશન પર નીકળી રહી છે જ્યાં ચાહકોને ટેસ્ટની ક્લાસિક રમત, વન-ડેની મજબૂત ટક્કર અને ટી૨૦નો સુપરફાસ્ટ રોમાંચ – ત્રણેયનો સ્વાદ એકસાથે ચાખવા મળશે.

ભારતીય ક્રિકેટ ટીમ માટે આગામી જૂન મહિનો અત્યંત વ્યસ્ત અને રોમાંચક રહેવાનો છે. ટીમ ઇન્ડિયા આ એક જ મહિનામાં કુલ ૬ આંતરરાષ્ટ્રીય મેચો રમશે, જેમાં ૧ ટેસ્ટ, ૩ વન-ડે અને ૨ ટી૨૦ મેચોનો સમાવેશ થાય છે. આ ધમાકેદાર પ્રવાસની શરૂઆત ૬ જૂનથી અફઘાનિસ્તાન સામેના મુકાબલાથી થશે. ત્રણેય ફોર્મેટ રમાવાના હોવાથી ભારતીય ટીમના તમામ નાના-મોટા અને સીનિયર-જૂનિયર ખેલાડીઓ મેદાન પર એક્શનમાં જોવા મળશે.

લાલ બોલનો રોમાંચ: અફઘાનિસ્તાન સામે એકમાત્ર ટેસ્ટ
જૂન મહિનાની શરૂઆત ટેસ્ટ ક્રિકેટના ક્લાસિક અંદાજથી થશે.

તારીખ: ૬ જૂનથી ૧૦ જૂન
મેદાન: ન્યૂ ચંદીગઢ

ભલે આ મેચ વિશ્વ ટેસ્ટ ચેમ્પિયનશિપ (WTC) નો હિસ્સો નથી, પણ ટીમ ઈન્ડિયા અફઘાનિસ્તાનને હળવાશથી લીધા વિના પોતાના આત્મવિશ્વાસને મજબૂત કરવાના ઈરાદાથી મેદાનમાં ઉતરશે.

મિશન વન-ડે વર્લ્ડ કપની શરૂઆત: ૩ વન-ડે મેચોની સિરીઝ
ટેસ્ટ મેચ પૂરી થયા બાદ ભારત અને અફઘાનિસ્તાન વચ્ચે ૩ વન-ડે મેચોની જંગ જામશે. આ સિરીઝથી આગામી વન-ડે વર્લ્ડ કપની તૈયારીઓનો પાયો નંખાશે. આ સિરીઝમાં રોહિત શર્મા અને વિરાટ કોહલીની પણ એન્ટ્રી થઈ છે. વિરાટનું રમવું નક્કી છે, જ્યારે કેપ્ટન રોહિત ફિટનેસ ટેસ્ટ પાસ કર્યા બાદ જ મેદાન પર દેખાશે.

વન-ડે સિરીઝનું ટાઈમટેબલ

૧લી વન-ડે: ૧૪ જૂન
૨જી વન-ડે: ૧૭ જૂન
૩જી વન-ડે: ૨૦ જૂન

વિદેશ પ્રવાસ: આયર્લેન્ડ સામે ટી૨૦નો જંગ
અફઘાનિસ્તાન સામે ઘરઆંગણે સિરીઝ પૂરી કરીને ભારતીય ટીમ સીધી આયર્લેન્ડના પ્રવાસે રવાના થશે. જ્યાં યજમાન ટીમ સામે ૨ ધમાકેદાર ટી૨૦ મેચો રમાશે. આ પ્રવાસ પૂરો કરીને ટીમ ઈન્ડિયા જુલાઈમાં રમાનારી સિરીઝ માટે ઈંગ્લેન્ડ જવા રવાના થશે.

૧લી ટી૨૦ મેચ: ૨૬ જૂન
૨જી ટી૨૦ મેચ: ૨૮ જૂન

ક્રિકેટ વિશ્લેષકોના મતે આ વ્યસ્ત શિડ્યુલ કેટલાક યુવા ખેલાડીઓ માટે 'અગ્નિપરીક્ષા' સમાન સાબિત થશે. સિનિયર ખેલાડીઓની હાજરી અને આગામી મોટી ટૂર્નામેન્ટ્સને જોતા, જે ખેલાડીઓ આ ૬ મેચોમાં શાનદાર પ્રદર્શન કરશે, તેમનું ટીમમાં સ્થાન પાકું થઈ જશે.