હરિયાણા વિધાનસભા ચૂંટણી 2024 માટે કોંગ્રેસે શનિવારે ચંદીગઢમાં તેનો ઢંઢેરો જાહેર કર્યો છે. કોંગ્રેસના 40 પાનાના મેનિફેસ્ટોમાં પાર્ટીએ લોકોને 25 લાખ રૂપિયા સુધીની મફત સારવાર અને મહિલાઓને દર મહિને 2,000 રૂપિયા આપવાનું વચન આપ્યું છે. આ ઉપરાંત સતલજ-યમુના લિંક (એસવાયએલ) કેનાલમાંથી પાણી લેવાનું વચન આપવામાં આવ્યું છે. તેના સાત દિવસ પહેલા દિલ્હીમાં કોંગ્રેસે હરિયાણાના લોકો માટે સાત ગેરંટીની જાહેરાત કરી હતી. તે કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેના નેતૃત્વમાં સાત વચનો અને મક્કમ ઇરાદાના નામે બહાર પાડવામાં આવ્યું હતું.

કોંગ્રેસે પોતાનો ઢંઢેરો બહાર પાડતી વખતે દાવો કર્યો હતો કે, તેણે તમામ વર્ગોને ધ્યાનમાં રાખ્યા છે. પાર્ટીએ પાછલી સરકારમાં પોતાના વચનો પૂરા કર્યા હોવાનો દાવો કર્યો છે. મેનિફેસ્ટોમાં બધા માટે ગુણવત્તાયુક્ત શિક્ષણ, યુવાનોને રોજગાર અને 25 લાખ રૂપિયા સુધીની મફત સારવાર જેવી આરોગ્ય સુવિધાઓનો સમાવેશ થાય છે. આ ઉપરાંત મહિલાઓને દર મહિને 2000 રૂપિયાની આર્થિક સહાય, ખેડૂત આયોગની રચના, લઘુત્તમ ટેકાના ભાવ (એમએસપી)ની ગેરંટી અને વંચિતોને 100 ચોરસ યાર્ડ પ્લોટ આપવાનું વચન આપવામાં આવ્યું છે.

મેનિફેસ્ટોના મુખ્ય વચનો

બધા માટે ગુણવત્તાયુક્ત શિક્ષણ

યુવાનોને રોજગાર

વધુ સારી આરોગ્ય સુવિધાઓ - 25 લાખ રૂપિયા સુધીની મફત સારવાર

મહિલાઓને દર મહિને 2000 રૂપિયાની સહાય

ખેડૂત આયોગની રચના અને લઘુત્તમ ટેકાના ભાવની ગેરંટી (MSP)

એક વિભાગની રચના જે સુનિશ્ચિત કરશે કે યુવાનોનું સામૂહિક સ્થળાંતર ન થાય

વંચિતોને 100 ચોરસ યાર્ડના પ્લોટની ખાતરી આપવામાં આવશે.

લઘુમતી આયોગની રચના

અમને વિશ્વાસ છે કે કોંગ્રેસ સરકાર બનાવશે

હરિયાણામાં ખેલાડીઓને રમતગમત ક્ષેત્રે ઉત્કૃષ્ટ દેખાવ કરવા પ્રોત્સાહિત કરવા માટે મજબૂત રમત નીતિ લાવવામાં આવશે. મેનિફેસ્ટો બહાર પાડતા કોંગ્રેસના નેતા અશોક ગેહલોતે કહ્યું કે, "અમે હમણાં જ મેનિફેસ્ટો બહાર પાડ્યો છે અને અમને વિશ્વાસ છે કે કોંગ્રેસ સરકાર બનાવશે. આ મેનિફેસ્ટોની નિયમિત સમીક્ષા કરવામાં આવશે અને તમામ વચનો પૂરા કરવા માટે દરેક શક્ય પ્રયાસ કરવામાં આવશે."