ડ્રાઇવરની સાથે ઝપાઝપી કરી : ભડાનેશના શખ્સ સહિત આઠ સામે ફરીયાદ

જામજોધપુરના ભડાનેશથી આગળ સીમ વિસ્તારમાં ખાનગી કંપનીના કર્મચારી કાયદેસરની જમીન ટેસ્ટીંગના કામે હોય દરમ્યાન ૭ થી ૮ જેટલા શખ્સો છકડો રીક્ષામાં આવી કર્મચારીઓની ગાડીઓ રોકીને ડ્રાઇવરની સાથે ઝપાઝપી કરી અપશબ્દો બોલી ધમકીઓ દીધી હતી જે અંગે પોલીસ ફરીયાદ નોંધાવવામાં આવી છે.
મુળ પસાયા બેરાજાના હાલ ઇવાપાર્ક-૧ ખાતે રહેતા રિલાયન્સમાં નોકરી કરતા ધીરજલાલ નાનજીભાઇ સોરઠીયા (ઉ.વ.૫૨)એ ગઇકાલે જામજોધપુર પોલીસ સ્ટેશનમાં ભડાનેશના બાલુ દેવા રબારી અને તેની સાથેના ૭ થી ૮ શખ્સો વિરુઘ્ધ આઇપીસી કલમ ૩૨૩, ૧૪૩, ૩૪૧, ૫૦૪, ૫૦૬(૨) મુજબ ફરીયાદ નોંધાવી છે.
ગઇકાલે બપોરના ચાર સાડાસચારના સુમારે ભડાનેશનથી આગળના વિસ્તાર ડામર રોડ પાસે ફરીયાદી ધીરજલાલ કાયદેસરના જમીન ટેસ્ટીંગના કામમાં હતા ત્યારે આરોપીઓ ગેરકાયદે મંડળી રચી છકડો રીક્ષામાં આવીને ફરીયાદીની ગાડીઓ રોકી હતી અને ફરીયાદી સાથેના કર્મચારી સુરેશભાઇ ડોડીયાની ગાડીના ડ્રાઇવર રાજેન્દ્રસિંહ જાડેજાને કોલર પકડી ઝપાઝપી કરી અપશબ્દો બોલી જાનથી મારી નાખવાની ધમકી આપી હતી. આ ફરીયાદના આધારે જામજોધપુર પોલીસે તપાસ હાથ ધરી છે.