જસદણ પંથકમાં સીમ વિસ્તારમાં કેબલ વાયરની ચોરી કરનાર ગેંગને વીંછિયા પોલીસે ઝડપી લીધી છે. મોટી લાખાવાડ ગામ પાસે પોલીસે ત્રિપુટીને ઝડપી લઇ તેની પાસેથી કોપર વાયર સહિત 31,450 નો મુદ્દામાલ કબજે કર્યો હતો. ઝડપાયેલ આ શખસોની પૂછતાછમાં અન્ય બે શખસોની પણ સંડોવણી ખુલી છે. આ ટોળકીએ સાત ગુનાની કબુલાત આપી હતી.

રાજકોટ જિલ્લા પોલીસવાડા હિમકરસિંહની સૂચનાના પગલે ગોંડલ ડીવાયએસપી કે.જી.ઝાલાના માર્ગદર્શન હેઠળ વીંછિયા પોલીસ મથકના પીઆઇ જે.પી.રાવની રાહબરીમાં અલગ અલગ ટીમ બનાવી ચોરી સહિતના બનાવવાનો ભેદ ઉકેલવા પોલીસ કામગીરી કરી રહી હતી. દરમિયાન હેડ કોન્સ્ટેબલ અશોકભાઈ સોસા વિક્રમસિંહ ગોહિલને મળેલી બાતમીના આધારે ઓરી ગામથી મોટી લાખાવાડ ગામ તરફ જવાના રસ્તે ત્રણ શખસોના હાથમાં પ્લાસ્ટિકની કોથળીઓ હોય જે શંકાસ્પદ જણાતા અને પોલીસને જોઈ આ શખસો ભાગવા જતા પોલીસે તુરંત તેમને અટકાવી તપાસ કરતા કોથળીમાંથી 19 કિલો કોપર વાયર મળી આવ્યો હતો. જેથી તે શક પડતી મિલકત તરીકે કબજે કરી શખસોની પૂછતાછ કરતા તેના નામ પ્રવીણ બાબાભાઈ પરમાર(ઉ.વ 28 રહે. હાલ ચોટીલા, મૂળ સાવરકુંડલા), સુરેશ નટુભાઈ સોલંકી(ઉ.વ 20 રહે. મોટા દેવડા તા. બાબરા) અને મુકેશ બાબુભાઈ સોલંકી (ઉ.વ 30 રહે મોટા દેવડા તા.બાબરા) હોવાનું જણાવ્યું હતું.

પોલીસે સઘન પૂછતાછ કરતા આ ટોળકી એ ગત તારીખ 18/4 હડમતીયા ગામે આવેલ ટેલીફોન એક્સચેન્જમાં થયેલ ચોરી સહિત કુલ સાત ચોરીની કબુલાત આપી હતી તેમજ ચોરીમાં તેમની સાથે અન્ય બે સાથીદારો હનુુ ઉર્ફે ટેટીયો સુરા ટપુભાઈ વાઘેલા અને અનિલ કિશોર વાઘેલા (રહે. બંને મોટા દેવળીયા તા. બાબરા) સામેલ હોવાનું જણાવ્યું હતું. પોલીસે ટોળકી પાસેથી કોપર વાયર, ડી.સી કેબલ સહિત કુલ રૂપિયા 31,450 ના મુદ્દામાલ કબજે કરી અન્ય બંને આરોપીઓને ઝડપી લેવા તપાસ હાથ ધરી છે.

પોલીસે જણાવ્યું હતું કે, આરોપીઓ દિવસના સમયે બાઈક લઈ સીમ તથા વાડી વિસ્તારમાં રેકી કરી રાત્રિના કેબલ ચોરીના બનાવને અંજામ આપતા હતા. જે માટે કેબલ કાપવા દાતરડું વાંદરી પાનું સહિતના સાધનો સાથે રાખતા હતા જો કોઈ પ્રતિકાર કરે તો પથ્થર મારવા માટે ગીલોલ પણ સાથે રાખતા હતા. ચોરી કર્યા બાદ કેબલ વાયર સળગાવી કોપર વેચી નાખતા હતા.

એક મહિનામાં આરોપીઓએ કરેલી ચોરી

કેબલ વાયર ચોરી કરનાર આ તસ્કર ટોળકીએ એકાદ મહિના પહેલા મોટા દેવળીયા ગામે વાડીમાંથી 100 ફૂટ કેબલ વાયર, પાંચ દિવસ પહેલા રાણીપડા ગામની સીમમાં દોઢસો ફૂટ વાયર, દસ દિવસ પહેલા રાંદલના દડવા ગામની સીમમાં દોઢસો ફૂટ કેબલ વાયર, 15 દિવસ પહેલા મોટા દેવળીયા ગામે મંદિર પાસેથી 125 ફૂટ વાયર, આજ સમયે અહીં મોટા દેવળીયા ગામે દશામાના મંદિર પાસેથી 70 ફૂટ વાયર, પાંચેક દિવસ પહેલા ઝુંડાળા ગામની સીમમાંથી 180 ફુટ વાયર અને એકાદ મહિના પહેલા વાસાવડ ગામે દેવળિયા વાસાવડની ગોળાઈના પુલ પાસેથી 40 ફૂટ કેબલ વાયરની ચોરી કરી અને કબુલાત આપી છે.