મહાપાલિકાના એસ્ટેટ વિભાગ અને દબાણ હટાવ સેલબી ટીમ દ્વારા શહેરના કાળીયાબીડ રોડ, પાણીની ટાંકી નજીક ખડકાયેલા બાથરૂમ અને દીવાલ સહિતના દબાણો સામે કાર્યવાહી હાથ ધરી ગેરકાયદેસર દબાણો પર બુલડોઝર ફેરવી તમામ દબાણો દૂર કરી જગ્યા ખુલ્લી કરાવાઈ હતી. સવારથી જ મ્યુ. તંત્રના કાફલાએ હાથ ધરેલી કાર્યવાહીમાં શહેરના હિમાલયા મોલ સામે જાહેર ફૂટપાથ પર લાંબા સમયથી મૂકી રાખવામાં આવતી રીક્ષા હટાવી લેવા અનેકવાર સૂચનાઓ આપવામાં આવી હોવા છતાં રીક્ષા નહીં હટાવતા આજે લોક ઠપકારી દંડની વસુલાત કરવામાં આવી હતી. મહાપાલિકાના એસ્ટેટ વિભાગ અને દબાણ હટાવ સેલની ટીમ દ્વારા પાણીની ટાંકી વિસ્તાર ઉપરાંત દેવુબાગ વિસ્તારમાં પણ દીવાલ અને બાથરૂમ સહિતના ગેરકાયદેસરના દબાણો હટાવી દઈ જગ્યા દબાણ મુક્ત કરાવાઈ હતી. મ્યુ. તંત્ર દ્વારા ગઈકાલે શહેરના ઘોઘાગેટ અને આંબાચોક તેમજ પીરછલ્લા વિસ્તારના અસ્થાઈ દબાણો હટાવ્યા બાદ આજે કાળીયાબીડ રોડ, પાણીની ટાંકી નજીક તેમજ દેવુબાગ વિસ્તારમાં ખડકાયેલા ગેરકાયદેસર દબાણો સામે કાર્યવાહી હાથ ધરવામાં આવતા દબાણકર્તાઓમાં ફફડાટ ફેલાયો છે.