અમદાવાદ મહાનગરપાલિકા (AMC) દ્વારા વિકાસ કાર્યો ઉપરાંત સુરક્ષા પાછળ પણ કરોડો રૂપિયાનો ખર્ચ કરવામાં આવી રહ્યો છે. AMCની વિવિધ કચેરીઓ, હોસ્પિટલો અને ભવનોમાં બાઉન્સરો અને સુરક્ષા જવાનો રાખવામાં આવે છે. છેલ્લા 10 વર્ષમાં સુરક્ષા પાછળ 245 કરોડ રૂપિયાનો જંગી ખર્ચ કરવામાં આવ્યો છે.

AMC જાણે બાઉન્સરોનો અખાડો બની ગયું હોય તેવું લાગી રહ્યું છે. કોર્પોરેશનના અધિકારીઓ અને સત્તાધીશોની સુરક્ષા માટે રાખવામાં આવેલા સિક્યુરિટી ગાર્ડ અને બાઉન્સરો પાછળ દર વર્ષે 50 કરોડ રૂપિયાનો ખર્ચ કરવામાં આવે છે. AMC દ્વારા એસ્કોર્ટ સિક્યુરિટી, શક્તિ સિક્યુરિટી, પેન્થર સિક્યુરિટી જેવી 11 સિક્યુરિટી કંપનીઓના 1851 ગાર્ડ સુરક્ષાનું કાર્ય કરે છે.

વિપક્ષના આરોપો:

વિપક્ષે AMC પર ભ્રષ્ટાચારના આરોપ લગાવ્યા છે. વિપક્ષનું કહેવું છે કે હોસ્પિટલો અને AMCની કચેરીઓમાં રાખવામાં આવેલા બાઉન્સરો દ્વારા નાગરિકોને હેરાન કરવામાં આવે છે. ફરિયાદ લઈને આવતા લોકોને ડરાવવામાં આવે છે. AMC દ્વારા સુરક્ષા પાછળ મોટો ખર્ચ કરવામાં આવે છે, પરંતુ કેટલાક કિસ્સાઓમાં કંપનીઓ દ્વારા નિયત કરતા ઓછા સિક્યુરિટી ગાર્ડ મૂકવામાં આવે છે. વિપક્ષે એવો પણ આરોપ લગાવ્યો છે કે AMCના સત્તાધીશો તેમની માનીતી કંપનીઓને બાઉન્સરોનો કોન્ટ્રાક્ટ આપીને કમાણી કરાવે છે.