જૂનાગઢ જિલ્લાના કેશોદ શહેરમાંથી કરોડો રૂપિયાની કિંમતી એમ્બરગ્રીસ એટલે કે સ્પર્મ વ્હેલ માછલીની ઉલ્ટીની ગેરકાયદેસર હેરાફેરીનો એક ચોંકાવનારો કિસ્સો પ્રકાશમાં આવ્યો છે. કેશોદ પોલીસે સ્થાનિક બસ સ્ટેન્ડ નજીકથી આંતરરાષ્ટ્રીય બજારમાં અંદાજે રૂ.1.62 કરોડની કિંમત ધરાવતા એમ્બરગ્રીસના જથ્થા સાથે બોટાદના એક યુવકને રંગેહાથ ઝડપી પાડ્યો છે. આ કામગીરી દ્વારા પોલીસે કરોડો રૂપિયાની દાણચોરીના મસમોટા નેટવર્કનો પર્દાફાશ કરવામાં સફળતા મેળવી છે. પકડાયેલા આરોપીની વધુ તપાસ માટે હાલ તેને વન વિભાગને સોંપવામાં આવ્યો છે.

શંકાસ્પદ યુવકની તપાસ અને ધરપકડ

આ સફળ કામગીરીની વિગતો મુજબ, કેશોદ પોલીસ સ્ટેશનના પીઆઈ ચૌધરી અને તેમની ટીમ બસ સ્ટેન્ડ વિસ્તારમાં કાયદો અને વ્યવસ્થા જાળવવા માટે પેટ્રોલિંગ કરી રહી હતી. આ દરમિયાન બસ સ્ટેન્ડ પાસે મોટરસાયકલ સાથે ઉભેલો એક યુવક પોલીસને જોઈને ગભરાઈ ગયો હતો અને પોતાની પાસે રહેલી થેલી તેમજ બેગ સંતાડવાનો પ્રયાસ કરવા લાગ્યો હતો. તેની આ શંકાસ્પદ હિલચાલ જોઈને પોલીસે તુરંત જ તેની અટકાયત કરી પૂછપરછ હાથ ધરી હતી. બેગની તલાશી લેતા તેમાંથી પ્લાસ્ટિકની કોથળીમાં છુપાવેલા નાના-મોટા સફેદ અને પીળા રંગના પદાર્થના ટુકડા મળી આવ્યા હતા. નિષ્ણાતો દ્વારા તપાસ કરાતા આ જથ્થો પ્રતિબંધિત સ્પર્મ વ્હેલ માછલીની કિંમતી ઉલ્ટી (એમ્બરગ્રીસ) હોવાનું સ્પષ્ટ થયું હતું.

મુદ્દામાલ અને આગળની કાર્યવાહી

પોલીસે ઘટનાસ્થળેથી કુલ ૧.૫૨૪ કિલોગ્રામ વજનનો એમ્બરગ્રીસનો જથ્થો જપ્ત કર્યો છે, જેની વૈશ્વિક બજારમાં કિંમત રૂ.1.62 કરોડ અંકાય રહી છે. આ સાથે જ પોલીસે બોટાદના વૈભવ અશ્વિન શુક્લા નામના આરોપીની ધરપકડ કરી છે અને તેની પાસેથી ગુનામાં વપરાયેલું મોટરસાયકલ તથા મોબાઈલ ફોન સહિત કુલ રૂ.1.63 કરોડનો મુદ્દામાલ કબજે કર્યો છે. ઉલ્લેખનીય છે કે, આંતરરાષ્ટ્રીય બજારમાં એમ્બરગ્રીસનો ઉપયોગ કિંમતી પરફ્યુમ (સુગંધિત દ્રવ્યો) અને વિશિષ્ટ દવાઓ બનાવવા માટે થતો હોવાથી તેની કિંમત સોના કરતાં પણ વધુ માનવામાં આવે છે. આ એક પ્રતિબંધિત વન્યજીવ સામગ્રી હોવાથી, કેશોદ પોલીસે પકડાયેલા આરોપીને અને જપ્ત કરાયેલા મુદ્દામાલને આગળની ઘનિષ્ઠ પૂછપરછ અને કાયદેસરની કાર્યવાહી માટે વન વિભાગ (ફોરેસ્ટ ડિપાર્ટમેન્ટ) ના હવાલે કર્યો છે.