આગામી તારીખ 7 થી ધોરણ 9 અને 11 ની વાર્ષિક પરીક્ષાઓ શરૂ થઈ રહી છે. તારીખ 19 એપ્રિલ સુધી ચાલનારી આ પરીક્ષામાં તારીખ 12 એપ્રિલના શેડ્યુલ માં ફેરફાર કરવામાં આવ્યો છે. ગુજરાત માધ્યમિક અને ઉચ્ચતર માધ્યમિક શિક્ષણ બોર્ડના સંયુક્ત નિયામક બી.એન.રાજગોરે આ સંદર્ભે તમામ જિલ્લા શિક્ષણ અધિકારીઓને એક પરિપત્ર પાઠવીને તારીખ 12 એપ્રિલ ની પરીક્ષા તારીખ 21 એપ્રિલના રોજ લેવા માટે સૂચના આપી છે.

બોર્ડના સંયુક્ત નિયામક દ્વારા જણાવાયું છે કે શૈક્ષણિક વર્ષ 2024 -25 ના શાળાકીય પ્રવૃત્તિ કેલેન્ડરની વિગતોમાં જાહેર કરાયેલી વિગત મુજબ ધોરણ નવ અને 11 ની શાળાકીય વાર્ષિક પરીક્ષાઓ તારીખ 7 થી 19 એપ્રિલ દરમિયાન લેવામાં આવનારી હતી. પરંતુ તારીખ 12 ના રોજ જ્ઞાન સાધના મેરીટ સ્કોલરશીપ પરીક્ષા નું આયોજન તમામ જિલ્લા મથકોએ બપોરે 12:00 વાગ્યાથી અઢી વાગ્યા દરમ્યાન કરવામાં આવેલ હોવાથી આ ફેરફાર કરવામાં આવ્યો છે.

શાળાકીય પરીક્ષાઓનો વિષયવાર કાર્યક્રમ તેમજ પ્રશ્નપત્રો શાળા વિકાસ સંકુલ દ્વારા અથવા તો શાળા કક્ષાએ નક્કી કરવામાં આવે છે. આ બાબતે ધ્યાનમાં લેતા તમામ માધ્યમિક અને ઉચ્ચતર માધ્યમિક શાળાઓમાં ધોરણ નવ અને 11 ની પરીક્ષામાં એકસૂત્રતા જળવાઈ તે માટે તારીખ 12 એપ્રિલના જે વિષયની પરીક્ષા રાખી હોય તે પરીક્ષા 21 એપ્રિલના રોજ લેવા માટેની સૂચના જીલ્લા વિકાસ અધિકારીના માધ્યમથી તમામ માધ્યમિક અને ઉચ્ચતર માધ્યમિક શાળાઓને કરવામાં આવી છે.