ડીસામાં મંજૂરી વિના જ ચાલતી ગેરકાયદેસર ફટાકડાની ફેક્ટરીમાં બ્લાસ્ટ થવાથી 21 શ્રમિકોના મોત થવાની ઘટનાના પગલે આખરે હવે વહીવટી તંત્ર દ્વારા પગલાં લેવાની શરૂઆત કરવામાં આવી છે અને ઓક્ટોબર 2024માં ડેપ્યુટી ચીફ કંટ્રોલર ઓફ એક્સ્પ્લોઝીવ્સ, વડોદરા તરફથી અપાયેલી ગાઇડલાઇનનું પાલન થાય છે કે નહીં અને તે મુજબની વ્યવસ્થા તમામ જિલ્લામાં આવેલા ફટાકડાં અને અન્ય વિસ્ફોટક પદાર્થોના સંગ્રહ સ્થાનો પર કરવામાં આવી છે કે નહીં તેની ચકાસણીના આદેશો તમામ જિલ્લા ક્લેક્ટર દ્વારા આપવામાં આવ્યા છે.પ્રાંત અધિકારીને તેમના તાબા હેઠળના વિસ્તારોમાં તાત્કાલિક તપાસ હાથ ધરીને બે દિવસમાં રીપોર્ટ આપવા સૂચના આપવામાં આવી છે.

તપાસ કરવા પ્રાંત અધિકારીઓને આદેશ
ડેપ્યુટી ચીફ કંટ્રોલર ઓફ એક્સ્પ્લોઝીવ્સ, વડોદરા તરફથી ફટાકડાના સંગ્રહ અને વેચાણ કરતા એકમોની પ્રવૃત્તિઓ પર દેખરેખ રાખવા અને ફટાકડાની દુકાનોના પરિસરમાં સલામતી સુનિશ્ચિત કરવા માટે ગાઇડલાઇન જારી કરવામાં આવી હતી. આ મામલે નિયમિત ચકાસણી કરવા અને લાયસન્સ ધરાવતા એકમો દ્વારા નિયમોનું પાલન કરવામાં આવે તે સુનિશ્ચિત કરવાની સૂચના આપવામાં આવી હતી. હવે ડીસાની ઘટના બાદ તમામ જિલ્લામાં વિસ્ફોટક પદાર્થોના ગોડાઉન, કેમિકલ ફેક્ટરીઓ, સંગ્રહસ્થાનોની તપાસ કરવા પ્રાંત અધિકારીઓને આપવામાં આવ્યા છે.

દુર્ઘટના ઘટે તેવી શક્યતા ધરાવતા એકમો કાર્યવાહી શરૂ
ડીસા જેવી ઘટનાનું પુનરાવર્તન ન થાય તે માટે વહીવટી તંત્ર દ્વારા તકેદારીના પગલાં લેવામાં આવી રહ્યા છે પ્રાંત અધિકારીઓ દ્વારા આગામી 48 કલાક દરમિયાન આવા તમામ એકમોની તપાસ કરવામાં આવશે જ્યાં જરૂર જણાવશે ત્યાં પોલીસને પણ સાથે રાખવામાં આવશે. રાજ્યના તમામ જિલ્લાઓમાં ગેરકાયદેસર રીતે ચાલતા જોખમી એકમો સામે તપાસની કવાયત શરૂ કરવામાં આવી છે. જોખમી જણાયેલા ને ગમે ત્યારે દુર્ઘટના ઘટે તેવી શક્યતા ધરાવતા આવા એકમો કાર્યવાહી શરૂ કરવામાં આવી છે.