પુણેની વિપ્રો ઓફિસમાં શું ચાલતું હતું??

વિપ્રોની એક ભૂતપૂર્વ મહિલા કર્મચારીએ આરોપ લગાવ્યો છે કે નોકરી દરમિયાન તેમને ધાર્મિક માન્યતાઓના આધારે હેરાન કરવામાં આવ્યા હતા. ફરિયાદમાં એવો પણ દાવો કરવામાં આવ્યો છે કે તેમના પર ધર્મ પરિવર્તન માટે દબાણ કરવામાં આવ્યું હતું, ભેદભાવપૂર્ણ વર્તન કરવામાં આવ્યું હતું અને અંતે એવી પરિસ્થિતિ ઉભી થઈ હતી કે તેમને રાજીનામું આપવાની ફરજ પડી હતી.

આ ગંભીર આરોપોના આધારે હિંજેવાડી પોલીસ સ્ટેશનમાં સત્તાવાર ફરિયાદ નોંધાઈ છે. પોલીસે કેસની પ્રાથમિક તપાસ શરૂ કરી દીધી છે અને ફરિયાદી દ્વારા રજૂ કરાયેલા દસ્તાવેજો તથા અન્ય પુરાવાઓની ચકાસણી કરવામાં આવી રહી છે.

દરમિયાન, આ કેસની સરખામણી નાસિકમાં અગાઉ સામે આવેલા ટીસીએસ સાથે જોડાયેલા એક વિવાદાસ્પદ કેસ સાથે કરવામાં આવી રહી છે. નાસિકના કેસમાં ધાર્મિક બળજબરી, જાતીય સતામણી અને કથિત ધર્મ પરિવર્તનના આરોપોની તપાસ માટે ખાસ તપાસ ટીમ એટલે કે એસઆઈટીની રચના કરવામાં આવી હતી. તે તપાસ દરમિયાન અનેક એફઆઈઆર નોંધાઈ હતી અને આરોપીઓની ધરપકડ પણ કરવામાં આવી હતી.

 પુણે પોલીસ હવે નાસિક એસઆઈટી દ્વારા અપનાવવામાં આવેલી તપાસ પદ્ધતિઓનો અભ્યાસ કરી રહી છે. બંને એજન્સીઓ વચ્ચે માહિતી અને અનુભવની આપ-લે અંગે ચર્ચા પણ થઈ હોવાનું જાણવા મળી રહ્યું છે.

પુણે પોલીસ આ કેસમાં કંપનીની આંતરિક ઈમેલ વ્યવસ્થા, કર્મચારીઓ વચ્ચે થયેલી વાતચીત, અગાઉ નોંધાયેલી આંતરિક ફરિયાદો તેમજ સંબંધિત અધિકારીઓ અને કર્મચારીઓની ભૂમિકાની પણ ઊંડાણપૂર્વક તપાસ કરશે. તપાસ દરમિયાન મળતા પુરાવાના આધારે આગળની કાયદાકીય કાર્યવાહી કરવામાં આવશે.

બીજી તરફ, વિપ્રો તરફથી હજુ સુધી આ આરોપોને લઈને કોઈ સત્તાવાર નિવેદન જાહેર કરવામાં આવ્યું નથી. કંપનીનો પ્રતિભાવ આવ્યા બાદ સમગ્ર મામલામાં વધુ સ્પષ્ટતા થવાની શક્યતા છે.

શું નાસિકની ટીસીએસ જેવોજ બનાવ પાછો થયો છે ??

નાસિક સ્થિત ટીસીએસ સાથે જોડાયેલા બીપીઓ યુનિટમાં ધાર્મિક બળજબરી, જાતીય સતામણી અને કથિત ધર્મ પરિવર્તનના આરોપો સામે આવ્યા બાદ નાસિક પોલીસે એક ખાસ તપાસ ટીમ (SIT) ની રચના કરી હતી.

આ કેસમાં અત્યાર સુધીમાં નવ એફઆઈઆર નોંધાઈ છે અને ઘણા આરોપીઓની ધરપકડ કરવામાં આવી છે. એસઆઈટીએ આ મામલે કોર્ટમાં બે ચાર્જશીટ પણ દાખલ કરી છે.

નાસિક કેસમાં, પોલીસે ગુપ્ત તપાસ હાથ ધરીને નોંધપાત્ર પુરાવા એકઠા કર્યા હતા. તપાસ દરમિયાન ઘણા ગંભીર આરોપો પ્રકાશમાં આવ્યા હતા, જેના કારણે રાજ્ય સરકારને પણ આ મામલાની સમીક્ષા કરવાની ફરજ પડી હતી.

વિપ્રો કેસમાં લગાવવામાં આવેલા આરોપોની ગંભીરતાને ધ્યાનમાં રાખીને, પુણે પોલીસ આ મામલાના દરેક પાસાની તપાસ કરવાની તૈયારી કરી રહી છે. ફરિયાદી દ્વારા રજૂ કરાયેલા પુરાવા, કંપનીમાં આંતરિક વાતચીત, ઈમેલ, આંતરિક ફરિયાદો અને તેમાં સામેલ કર્મચારીઓની ભૂમિકાની તપાસ કરવામાં આવશે.