પોરબંદરના બગવદર નજીક બાઇક આડે નંદી ઉતરતા સર્જાયેલા અકસ્માતમાં યુવાનનુ મોત નિપજ્યુ છે.
રાણાવાવના આશાબા સીમ વિસ્તારમાં રહેતા કેશુભાઇ ચુંડાવદરાએ બગવદર પોલીસમથકમાં એવુ જાહેર કર્યુ છે કે વજશીભાઇ કેશુભાઇ ચુંડાવદરા ઉ.વ. ૨૮ તા. ૩૧-૧૦ના પોતાનુ બાઇક લઇને કલ્યાણપુરથી રાણાવાવ આવતો હતો એ દરમ્યાન બગવદર નજીક નાયરા પેટ્રોલપંપ પાસે અચાનક રખડતો નંદી બાઇક આડે આવી જતા અકસ્માત સર્જાયો હતો જેમાં વજશીને ગંભીર ઇજા થતા સારવાર માટે હોસ્પિટલે ખસેડવામાં આવ્યો હતો જ્યાં સારવાર દરમ્યાન આ યુવાનનુ મોત થયુ છે.
ઉલ્લેખનીય છે કે મુખ્ય રસ્તા અને હાઇવે પર બેફામ બનેલા પશુઓ વારંવાર અકસ્માત સર્જી રહયા છે અને તેમાં નિર્દોષ લોકો તેનો ભોગ બની રહયા છે ત્યારે આ પ્રકારનો વધુ એક બનાવ બનતા પરિવાર ઉપર વજ્રઘાત થયો છે.