• લિપસ્ટિક અન્ડર માય બુર્ખા ફેમ એક્ટ્રેસને એક ઇવેન્ટમાં થયો ખરાબ અનુભવ
• આહનાએ બોલીવૂડના મોટા-મોટા કલાકારોની ફિલ્મો ફ્લોપ થતાં માર્યો ટોણો

અમિતાભ બચ્ચન સાથે કામ કરી ચુકેલી એક્ટ્રેસ તાજેતરમાં શારીરિક શોષણનો ભોગ બની. લિપસ્ટિક અન્ડર માય બુર્ખા ફેમ અભિનેત્રી આહના કુમરાને એક ઇવેન્ટમાં કડવો અનુભવ થયો હતો. જ્યાં એક ફેને તેની કમર પકડી લીધી હતી. જેથી તે ખુબ જ નારાજ થઇ હતી અને તેણે આ શખસને ઝાટકી દીધો હતો.

એક્ટ્રેસ આહના કુમરા સાથે એક ઈવેન્ટ દરમિયાન ચોંકાવનારી ઘટના બની કે જેના કારણે તે ગુસ્સે થઈ ગઈ હતી. વાત જાણે એમ છે કે એક પ્રશંસકે તસવીર લેતી વખતે અભિનેત્રી આહના કુમરાને કમરથી પકડી લીધી હતી. જેથી એક્ટ્રેસ આહના કુમરા ગુસ્સે થઈ ગઈ અને કહ્યું કે, 'મને સ્પર્શ કરશો નહીં'. અન્ય ઘણાં ફેન્સ પણ આહના કુમરા સાથે તસવીરો ક્લિક કરી રહ્યા હતા અને અભિનેત્રીને સ્પર્શ કરવાનો પ્રયાસ કરી રહ્યા હતા. પરંતુ, એક્ટ્રેસ આહના કુમરા ખૂબ જ ધીરજથી તસવીરો ક્લિક કરાવી રહી હતી.

અમિતાભ બચ્ચન સાથે ટીવી સીરિયલ યુદ્ધ તથા એકતા કપૂરની ફિલ્મ લિપસ્ટિક અન્ડર માય બુર્ખા અને ધ એક્સિડેન્ટલ પ્રાઈમ મિનિસ્ટર જેવી ફિલ્મો બાદ ચર્ચામાં આવેલી બોલ્ડ એક્ટ્રેસ આહના કુમરાએ થોડા સમય પહેલા એક અંગ્રેજી અખબાર સાથેની વાતચીતમાં એક મોટું નિવેદન આપ્યું હતું. આહના સ્પષ્ટ શબ્દોમાં કહે છે કે, એક સારી ફિલ્મ બનાવવા માટે મોટા સ્ટાર્સ નહીં પણ થિએટર આર્ટિસ્ટની જરૂર હોય છે. છેલ્લાં કેટલાંક વર્ષોમાં મોટા-મોટા સ્ટાર્સની ફિલ્મોની શું હાલત થઈ તે જગજાહેર છે.

આહનાએ એવું પણ કહ્યું કે ‘બદલાતા સમય સાથે આપણા દર્શકો પણ બદલાયા છે, તે હવે અભિનય અને ફિલ્મોના કન્ટેન્ટની તુલના દેશ-દુનિયાની ઉપલબ્ધ સામગ્રી સાથે કરે છે. અત્યારે જે પ્રકારનું કન્ટેન્ટ પસંદ કરવામાં આવી રહ્યું છે, તેને જોઈને લાગે છે કે, થિએટર કલાકારો જ્યારે એકઠાં થાય છે ત્યારે એક શાનદાર ફિલ્મ બને છે. મારી શરૂઆત પૃથ્વી થિએટરમાં નાના-મોટા કામો કરવાથી થઈ હતી. હું થિએટરની ઑફિસમાં માત્ર એટલા માટે કામ કરતી હતી, જેથી મને પૃથ્વીમાં વધુમાં વધુ સમય વિતાવવાનો મોકો મળે.

એક સારી અને શાનદાર ફિલ્મ સ્ટાર્સ નહીં પણ થિએટરના આર્ટિસ્ટ બનાવે છે. સ્ટાર્સ પાવરથી ફિલ્મો વેચાય છે. છેલ્લા એક દાયકાથી થિએટર સાથે જોડાયેલી આહના કહે છે કે...

સતત ફિલ્મોના શૂટિંગ બાદ એક સમય એવો આવે છે જ્યારે થિએટરમાં પરફોર્મ કરવાની તલબ ઉઠે છે, આ તલબ ત્યાં સુધી શાંત નથી થતી જ્યાં સુધી એકસાથે ત્રણ-ચાર પ્લે (નાટક) ન કરી લઉં. ઘણીવાર તો હું સવારે ઉઠતાની સાથે જ ઘરેથી નીકળી સીધી જુહૂ સ્થિત પૃથ્વી થિએટર પહોંચી જાઉં છું. મારો આખો દિવસ ત્યાં જ પસાર કરું છું, પાછી આવું ત્યારે એક અલગ પ્રકારનો ઉત્સાહ અને એક જુદા જ પ્રકારની એનર્જી મારી સાથે હોય છે.