મહારાષ્ટ્રના પુણેમાં વધુ એક હિટ એન્ડ રનનો એક કિસ્સો પ્રકાશમાં આવ્યો છે.કોરેગાંવ પાર્ક વિસ્તારમાં એક ઓડી કરના ચાલકે પુરપાટ ઝડપે કાર હંકારીને બાઇક સવાર ડિલિવરી બોયને ટક્કર મારી હતી. અકસ્માત બાદ બાઇક સવારને તાત્કાલિક સારવાર માટે હોસ્પિટલમાં ખસેડવામાં આવ્યો હતો. રાત્રે 1.30 વાગ્યાની આસપાસ બનેલા આ ભયાનક અકસ્માતમાં 21 વર્ષના ડિલિવરી બોયનું સારવાર દરમિયાન મોત થયું હતું.આ ઘટના બાદ ડ્રાઈવર કાર લઈને સ્થળ પરથી ફરાર થઈ ગયો હતો. પ્રત્યક્ષદર્શીઓ એ જણાવ્યું હતું કે કાર સવાર દારૂના નશામાં હતો.
પોલીસના જણાવ્યા અનુસાર, મૃતકની ઓળખ રઉફ અકબર શેખ (21) તરીકે થઈ છે. રઉફ શેખ ફૂડ ડિલિવરી બોય તરીકે કામ કરતો હતો. આ પહેલા કાર સવારે એક સ્કૂટરને પણ ટક્કર મારી હતી, જેમાં ત્રણ લોકો ઘાયલ થયા હતા. આરોપીએ બાઇક સવારને ટક્કર માયર્િ બાદ પણ કાર રોકી ન હતી. ડ્રાઈવર ઈજાગ્રસ્તને કાર નીચે કચડીને ઘટનાસ્થળેથી ફરાર થઈ ગયો હતો. પોલીસે આ વિસ્તારમાં લગાવેલા સીસીટીવી કેમેરા પરથી કારની ઓળખ કરી હતી. આ પછી માલિકને શોધી કાઢવામાં આવ્યો હતો. ત્યારબાદ પોલીસે આરોપીની હડપસર વિસ્તારમાં આવેલા તેના ઘરેથી ધરપકડ કરી હતી. આરોપીની ઓળખ આયુષ તાયલ (34) તરીકે થઈ છે.

આરોપીને મેડિકલ ચેકઅપ માટે મોકલી અપાયો
પુણે ડીસીપીએ જણાવ્યું કે આરોપીને મેડિકલ ચેકઅપ માટે મોકલવામાં આવ્યો છે. રિપોર્ટ આવ્યા બાદ જ કહી શકાશે કે ઘટના સમયે ડ્રાઈવર નશામાં હતો કે નહીં. પોલીસ આ મામલે તપાસ કરી રહી છે પોલીસે ઓડી ડ્રાઈવર આયુષ પ્રદીપ તાયલ (34)ની ધરપકડ કરી છે અને તેની સામે વિવિધ કલમો હેઠળ કેસ નોંધ્યો છે. કાર પણ જપ્ત કરવામાં આવી છે. સ્થાનિક કોર્ટે તાયલને 13 ઓક્ટોબર સુધી પોલીસ કસ્ટડીમાં મોકલી દીધો છે.