છત્તીસગઢના બીજાપુરમાં ફરી એકવાર સુરક્ષા દળો અને નક્સલવાદીઓ વચ્ચે અથડામણ ચાલી રહી છે. અત્યારસુધી મળેલી માહિતી અનુસાર, આ એન્કાઉન્ટરમાં સૈનિકોએ 8 નક્સલીઓને ઠાર માર્યા છે. એક વરિષ્ઠ પોલીસ અધિકારીએ જણાવ્યું હતું કે, આજે બીજાપુર જિલ્લામાં સુરક્ષા દળો અને નક્સલવાદીઓ વચ્ચે એન્કાઉન્ટર થયું હતું. અધિકારીએ જણાવ્યું હતું કે, આ એન્કાઉન્ટર સવારે 8.30 વાગ્યાની આસપાસ ગંગાલુર પોલીસ સ્ટેશન વિસ્તાર હેઠળના જંગલમાં થયું હતું, જ્યાં સુરક્ષા કર્મચારીઓની સંયુક્ત ટીમ નક્સલ વિરોધી કાર્યવાહી પર હતી.

સર્ચ ઓપરેશન ચાલુ છે
ઘટનાસ્થળે સર્ચ ઓપરેશન ચાલુ છે. પોલીસ અધિકારીએ આ માહિતી આપી છે. મળતી માહિતી મુજબ, ગંગાલુર પોલીસ સ્ટેશન વિસ્તાર હેઠળના જંગલમાં આ એન્કાઉન્ટર હજુ પણ ચાલુ છે.

વરિષ્ઠ અધિકારીએ જણાવ્યું હતું કે, હજુ પણ વચ્ચે-વચ્ચે ગોળીબાર ચાલુ છે અને વિગતવાર માહિતીની રાહ જોવાઈ રહી છે. તેમણે કહ્યું કે, આ કામગીરીમાં ડિસ્ટ્રિક્ટ રિઝર્વ ગાર્ડ (DRG), સ્પેશિયલ ટાસ્ક ફોર્સ (STF), સેન્ટ્રલ રિઝર્વ પોલીસ ફોર્સ (CRPF) અને તેની સ્પેશિયલ યુનિટ કોબ્રા (કમાન્ડો બટાલિયન ફોર રિઝોલ્યુટ એક્શન)ના સૈનિકો સામેલ છે. પશ્ચિમ બસ્તર ડિવિઝનમાં માઓવાદીઓની હાજરીની માહિતીના આધારે શુક્રવારે આ ઓપરેશન શરૂ કરવામાં આવ્યું હતું.