ડીસામાં ઢુંવા રોડ પર આવેલી ગેરકાયદે ફટાકડાની ફેક્ટરી અને ગોડાઉનમાં ભીષણ આગ ફાટી નીકળતાં 21 મજૂરોના મોત થયા છે. મૃતકોમાં ચારથી પાંચ કિશોરનો પણ સમાવેશ થાય છે, જેના કારણે આ ઘટના વધુ ગંભીર બની છે. આ ઘટના બાદ પોલીસે ફેક્ટરી માલિક દીપક મોહનાનીની ઈડરથી ધરપકડ કરી છે, જ્યારે તેના પિતા ખૂબચંદ મોહનાની ફરાર છે. આ કેસની તપાસ માટે SITની રચના કરવામાં આવી છે.

આ ભયાનક આગની ઘટનામાં અનેક લોકો ગંભીર રીતે દાઝી ગયા હોવાના પણ સમાચાર છે. મૃત્યુ પામેલા અને ઘાયલ થયેલા લોકો મધ્યપ્રદેશના વતની હોવાનું જાણવા મળ્યું છે. મધ્યપ્રદેશ સરકાર પણ આ ઘટનાને લઈને ગંભીર છે અને અસરગ્રસ્ત પરિવારોને તમામ શક્ય મદદ કરવા માટે તૈયાર છે. રાત્રે 2 વાગ્યે મધ્યપ્રદેશના અધિકારીઓને તમામ મૃતદેહ સોંપવામાં આવશે.