દિલ્હીમાં 77મા પ્રજાસત્તાક દિવસની ઉજવણી ચાલી રહી છે. રાષ્ટ્રપતિ દ્રૌપદી મુર્મુ સમારોહમાં મુખ્ય મહેમાનો યુરોપિયન કાઉન્સિલના પ્રમુખ એન્ટોનિયો કોસ્ટા અને યુરોપિયન કમિશનના પ્રમુખ ઉર્સુલા વોન ડેર લેયેન સાથે પહોંચ્યા હતા. પીએમ મોદીએ રાષ્ટ્રપતિ મુર્મુ અને મહેમાનોનું સ્વાગત કર્યું હતું. રાષ્ટ્રપતિ મુર્મુને 21 તોપોની સલામી આપવામાં આવી હતી.

પીએમ મોદીએ શહીદોને શ્રદ્ધાંજલિ આપી

પ્રધાનમંત્રી નરેન્દ્ર મોદીએ 77મા પ્રજાસત્તાક દિવસ નિમિત્તે રાષ્ટ્રીય યુદ્ધ સ્મારક ખાતે શહીદોને શ્રદ્ધાંજલિ આપી હતી.

રાજનાથ સિંહે શુભેચ્છા પાઠવી

કેન્દ્રીય સંરક્ષણ મંત્રી રાજનાથ સિંહે દિલ્હીમાં 2026ના પ્રજાસત્તાક દિવસ નિમિત્તે રાષ્ટ્રને શુભેચ્છા પાઠવી હતી. તેમણે જણાવ્યું કે 2047 સુધીમાં ભારતને વિકસિત રાષ્ટ્ર તરીકે સ્થાપિત કરવાનું લક્ષ્ય છે, અને આ માટે તમામ નાગરિકોની ભાગીદારી જરૂરી છે.

રાહુલ ગાંધીએ શુભેચ્છા પાઠવી

કોંગ્રેસ નેતા રાહુલ ગાંધીએ પ્રજાસત્તાક દિવસ પર તમામ દેશવાસીઓને હાર્દિક શુભેચ્છાઓ પાઠવી હતી. તેમણે કહ્યું કે ભારતનું બંધારણ દરેક નાગરિકનું સૌથી મોટું શસ્ત્ર છે, જે તેમના અવાજ તરીકે સેવા આપે છે અને તેમના અધિકારોનું રક્ષણ કરે છે.

રાહુલ ગાંધીએ જણાવ્યું હતું કે ભારતીય પ્રજાસત્તાક બંધારણના મજબૂત પાયા પર ઊભું છે અને સમાનતા અને સંવાદિતા જ તેને મજબૂત બનાવી શકે છે. તેમણે ભાર મૂક્યો કે બંધારણનું રક્ષણ કરવું એ ભારતીય પ્રજાસત્તાકનું રક્ષણ છે અને આપણા સ્વાતંત્ર્ય સેનાનીઓના બલિદાનને સાચી શ્રદ્ધાંજલિ છે.

પહેલી વાર કોમ્બેટ પરેડ

ઓપરેશન સિંદૂર પછી પહેલી વાર યોજાઈ રહેલા આ પ્રજાસત્તાક દિવસની ઉજવણીમાં પરંપરાગત ઔપચારિક પરેડને બદલે કોમ્બેટ પરેડનો સમાવેશ થશે. 26 જાન્યુઆરીએ, સશસ્ત્ર દળોની ત્રણેય શાખાઓ - આર્મી, એરફોર્સ અને નેવીની માર્ચિંગ ટુકડીઓ પરંપરાગત ગિયરને બદલે કોમ્બેટ ફોર્મેશનમાં રજૂ કરવામાં આવશે. આ વર્ષની પરેડમાં ભારતીય સેનાના યુદ્ધભૂમિના ફોર્મેશનનું પ્રદર્શન કરવામાં આવશે. ભૈરવ બટાલિયનના સૈનિકો, વિવિધ સ્કાઉટ્સ, ટેન્ક, આર્ટિલરી, રોકેટ અને મિસાઇલોને યુદ્ધભૂમિ પર તૈનાત કરવામાં આવશે. પરેડમાં ભાગ લેનાર સેનાના ઘોડેસવાર પણ પહેલી વાર કોમ્બેટ યુનિફોર્મમાં જોવા મળશે. વધુમાં, સેનાના માર્ચિંગ ટુકડીઓ અને ઓપરેશન સિંદૂરમાં સામેલ શસ્ત્રો, જેમ કે ડ્રોન વોરફેર અને એર ડિફેન્સ મિસાઇલો, પણ પરેડનો ભાગ હશે.