કેન્દ્ર સરકારના ગૃહ મંત્રાલય દ્વારા આજે, ૨ જુલાઈ ૨૦૨૬ના રોજ એક સત્તાવાર જાહેરનામું બહાર પાડીને ગુજરાત પોલીસ સેવા (GPS)ના 6 વરિષ્ઠ અધિકારીઓને ભારતીય પોલીસ સેવા (IPS)માં પ્રોમોશન આપવાની જાહેરાત કરવામાં આવી છે. રાષ્ટ્રપતિ દ્વારા મંજૂર કરાયેલા આ આદેશ અનુસાર, 'સિલેક્ટ લિસ્ટ ૨૦૨૫' હેઠળ આ તમામ અધિકારીઓની આઈપીએસ તરીકે નિમણૂક કરવામાં આવી છે અને તેમને ગુજરાત કેડર જ ફાળવવામાં આવી છે.​​​​​​​

પ્રોમોશન મેળવનાર 6 અધિકારીઓની યાદી

ગૃહ મંત્રાલય દ્વારા જાહેર કરાયેલી સત્તાવાર યાદી મુજબ, જે અધિકારીઓને જીપીએસમાંથી આઈપીએસ તરીકે બઢતી મળી છે તેમાં નીચે મુજબના નામોનો સમાવેશ થાય છે

૧. રાજદિપસિંહ એન. નકુમ 

૨. ભરતકુમાર બી. રાઠોડ 

૩. પ્રફુલ વી. વાણિયા

૪. રાજેશકુમાર ટી. પરમાર 

૫. કલ્પેશકુમાર એમ. ચાવડા )

૬. રાકેશ ડી. દેસાઈ 

આ તમામ અધિકારીઓ લાંબા સમયથી રાજ્યના વિવિધ જિલ્લાઓ અને સંવેદનશીલ વિભાગોમાં ઉચ્ચ પદો પર ફરજ બજાવી ચૂક્યા છે અને તેમની ઉત્કૃષ્ટ કામગીરીને આધારે જ કેન્દ્ર સરકારે આ બઢતી મંજૂર કરી છે.

એક વર્ષ પ્રોબેશન અને ટ્રેનિંગ લેવી પડશે

કેન્દ્રીય ગૃહ મંત્રાલયના નોટિફિકેશનમાં જણાવ્યા અનુસાર, ઇન્ડિયન પોલીસ સર્વિસ (રિક્રુટમેન્ટ) રૂલ્સ, ૧૯૫૪ અને પ્રમોશન નિયમોના આધારે આ નિયુક્તિઓ કરવામાં આવી છે. આ તમામ પ્રમોટેડ અધિકારીઓ હાલમાં એક વર્ષ માટે પ્રોબેશન (પરીક્ષણ) પીરિયડ હેઠળ રહેશે. આ સમયગાળા દરમિયાન તેમણે આઈપીએસ કેડરના નિયમો મુજબ જરૂરી ઇન્ડક્શન ટ્રેનિંગ (તાલીમ) પણ પૂર્ણ કરવાની રહેશે. આ પ્રમોશનને કારણે ગુજરાત પોલીસમાં આઈપીએસ અધિકારીઓની અછત અમુક અંશે હળવી થશે અને કાયદો-વ્યવસ્થાની સ્થિતિને વધુ મજબૂત બનાવવામાં મદદ મળશે. આ સમાચારને પગલે સમગ્ર પોલીસ બેડામાં ખુશીનો માહોલ જોવા મળી રહ્યો છે.