અમદાવાદ શહેરના કોટ વિસ્તાર અને દક્ષિણ ઝોનમાં ગુનાખોરીના ગ્રાફમાં સતત વધારો થઈ રહ્યો છે. ગત મોડી રાત્રે અમદાવાદના બહેરામપુરા વિસ્તારમાં એક સનસનાટીભરી ઘટના સામે આવી છે, જેમાં માત્ર 19 વર્ષના એક આશાસ્પદ યુવકની તીક્ષ્ણ હથિયારના ઘા ઝીંકી સરાજાહેર હત્યા કરી દેવામાં આવી છે. આ ઘટનાને પગલે સમગ્ર વિસ્તારમાં ચકચાર મચી ગઈ છે અને સ્થાનિકોમાં ભયનો માહોલ જોવા મળી રહ્યો છે.

બાઈક પર જઈ રહેલા યુવક પર હુમલો

મળતી માહિતી મુજબ, બહેરામપુરા વિસ્તારમાં રહેતો હિમેશ પરમાર (ઉંમર 19 વર્ષ) ગત રાત્રે પોતાનું બાઈક લઈને બહેરામપુરાના હીરાલક્ષ્મી ફ્લેટ પાસેથી પસાર થઈ રહ્યો હતો. આ દરમિયાન રસ્તામાં કોઈ અજાણ્યા શખસ સાથે તેને અગમ્ય કારણોસર તકરાર થઈ હતી. બોલાચાલી એટલી હદે વધી ગઈ કે ઉશ્કેરાયેલા અજાણ્યા શખસે પોતાની પાસે રહેલા તીક્ષ્ણ હથિયાર વડે હિમેશ પર આડેધડ હુમલો કરવાનું શરૂ કરી દીધું હતું. હુમલાખોરે હિમેશના પેટ, હાથ અને શરીરના અન્ય ભાગો પર ગંભીર ઘા માર્યા હતા. લોહીલુહાણ હાલતમાં હિમેશ રસ્તા પર જ ઢળી પડ્યો હતો, જ્યારે હુમલાખોર અંધારાનો લાભ લઈને ઘટનાસ્થળેથી ફરાર થઈ ગયો હતો.

હોસ્પિટલમાં દમ તોડ્યો

જાહેરમાં બનેલી આ ઘટનાને જોઈ આસપાસના લોકો તાત્કાલિક દોડી આવ્યા હતા. ગંભીર રીતે ઘાયલ હિમેશને તાત્કાલિક સારવાર અર્થે નજીકની એલ.જી. હોસ્પિટલ ખસેડવામાં આવ્યો હતો. બીજી તરફ, આ બનાવ અંગે પોલીસ અને હિમેશના પરિવારજનોને જાણ કરવામાં આવી હતી. પરિવારના સભ્યો હોસ્પિટલ પહોંચ્યા ત્યારે વાતાવરણ ગમગીન બની ગયું હતું. જોકે, કમનસીબે વધુ લોહી વહી જવાને કારણે અને ગંભીર ઈજાઓને લીધે સારવાર દરમિયાન જ હિમેશનું મોત નીપજ્યું હતું.

પોલીસ તપાસ અને સીસીટીવી ફૂટેજ

ઘટનાની જાણ થતા જ કાગડાપીઠ પોલીસનો કાફલો ઘટનાસ્થળે અને હોસ્પિટલ દોડી ગયો હતો. પોલીસે મૃતદેહને પોસ્ટમોર્ટમ માટે મોકલી આપી હત્યાનો ગુનો નોંધવાની તજવીજ હાથ ધરી છે. હુમલાખોર કોણ હતો અને તેની પાછળનું કારણ શું હતું તે હજુ સુધી સ્પષ્ટ થયું નથી.

પોલીસ અધિકારીના જણાવ્યા મુજબ, અમે ઘટનાસ્થળની આસપાસના તમામ સીસીટીવી (CCTV) ફૂટેજ એકત્રિત કર્યા છે. હુમલાખોરનું પગેરું મેળવવા માટે અલગ-અલગ ટીમો બનાવવામાં આવી છે. પ્રાથમિક દ્રષ્ટિએ આ અંગત અદાવત છે કે અચાનક થયેલી તકરાર, તે દિશામાં તપાસ ચાલુ છે.

સ્થાનિકોમાં રોષ

જાહેરમાં થયેલી આ હત્યાને પગલે કાયદો અને વ્યવસ્થાની સ્થિતિ સામે પણ સવાલો ઉઠી રહ્યા છે. 19 વર્ષના યુવાનના મોતના સમાચારથી તેના પરિવારમાં માતમ છવાઈ ગયો છે. પોલીસે ટૂંક સમયમાં જ આરોપીને ઝડપી લેવાનો વિશ્વાસ વ્યક્ત કર્યો છે.