ખંભાળિયા: રાજપરામાં યુવાન પર છરી વડે હુમલો: ત્રણ સામે ફરિયાદ
મીઠાપુરના રાજપરા વિસ્તારમાં રહેતા રૂકસાનાબેન મજીદભાઈ ચાવડા નામના ૩૦ વર્ષના મહિલાના ઘરના ફળિયામાં મૂળવેલ ગામના ખેંગારભા ગભાભા માણેક નામના શખ્સએ રાત્રિના સમયે પથ્થરોના ઘા કર્યા હતા. અને ફરિયાદી રૂકસાનાબેન તથા સાહેદ મજીદભાઈ ઘરની બહાર જતા આરોપી ખેંગારભા માણેકએ પોતાના હાથમાં રહેલી છરી મજીદભાઈને મારવા માટે જતા રૂકસાનાબેન વચ્ચે પડ્યા હતા. આ ઉપરાંત અન્ય આરોપીઓ રાજેશભા ગભાભા માણેક તથા અન્ય એક અજાણ્યા શખ્સએ લાકડા વડે તેઓને બેફામ માર માર્યો હતો. આટલું જ નહીં, તેમને બચાવવા વચ્ચે પડેલા આસિફભાઈને પણ બળતણના લાકડાના બે ઘા ફટકારી દીધા હતા.
આમ, એક અજાણ્યા સહિત ત્રણેય આરોપીઓએ રૂકસાનાબેન, મજીદભાઈ અને આસિફભાઈને બેફામ માર મારી, બિભત્સ ગાળો ભાંડી, જાનથી મારી નાખવાની ધમકી પણ આપી હોવાનું મીઠાપુર પોલીસમાં જાહેર થયું છે. જે અંગે પોલીસે તમામ ત્રણ આરોપીઓ સામે બી.એન.એસ. અને જી.પી. એક્ટની જુદી જુદી કલમ હેઠળ ગુનો નોંધ્યો છે.
