દક્ષિણ અમેરિકી દેશ આર્જેન્ટિનામાં 7.5ની તીવ્રતાનો શક્તિશાળી ભૂકંપ આવ્યો છે. તેના પગલે સુનામીની ચેતવણી જારી કરવામાં આવી છે. આ ભૂકંપ ભારતીય સમય અનુસાર સાંજે 6:30 વાગ્યે આવ્યો હતો. ભૂકંપનું કેન્દ્ર આર્જેન્ટિનાના દક્ષિણી રાજ્ય ઉશુઆઈયાથી 222 કિમી દૂર સમુદ્રમાં ડ્રેક પેસેજમાં હતું, જેની ઊંડાઈ 10 કિમી હતી.

તમને જણાવી દઈએ કે ડ્રેક પેસેજ દક્ષિણ અમેરિકાના કેપ હોર્ન, ચિલી, આર્જેન્ટિના અને એન્ટાર્કટિકાના દક્ષિણ શેટલેન્ડ ટાપુઓની વચ્ચેનો દરિયાઈ વિસ્તાર છે.

વહીવટી તંત્રએ લોકોને ઊંચી જગ્યાએ જવા માટે કહ્યું છે. અસરગ્રસ્ત વિસ્તારોમાં સુનામીની ચેતવણીના સાયરન વાગવા લાગ્યા છે. હજી સુધી કોઈ જાનહાનિના સમાચાર નથી. એક દિવસ પહેલાં પણ આર્જેન્ટિનામાં 5.8ની તીવ્રતાનો ભૂકંપ આવ્યો હતો.