અમદાવાદના નરેન્દ્ર મોદી સ્ટેડિયમ ખાતે રમાયેલી IPL 2025ની એક મહત્વપૂર્ણ મેચમાં ગુજરાત ટાઇટન્સે સનરાઇઝર્સ હૈદરાબાદને 38 રને પરાજય આપ્યો છે. આ જીત સાથે ગુજરાતે પોઇન્ટ્સ ટેબલમાં બીજું સ્થાન હાંસલ કરી લીધું છે, જ્યારે હૈદરાબાદ માટે પ્લેઓફની રેસ વધુ મુશ્કેલ બની ગઈ છે.

હૈદરાબાદે ટોસ જીતીને પ્રથમ બોલિંગ કરવાનો નિર્ણય લીધો હતો, જેને ખોટો સાબિત કરતા ગુજરાત ટાઇટન્સના બેટ્સમેનોએ શાનદાર પ્રદર્શન કર્યું હતું. ગુજરાતે 20 ઓવરમાં 6 વિકેટ ગુમાવીને 224 રનનો મોટો સ્કોર ખડક્યો હતો. ગુજરાત તરફથી કેપ્ટન શુભમન ગિલે સૌથી વધુ 76 રન બનાવ્યા હતા, જ્યારે જોસ બટલરે 64 અને સાઈ સુદર્શને 48 રનનું યોગદાન આપ્યું હતું. હૈદરાબાદ માટે જયદેવ ઉનડકટે 3 વિકેટ ઝડપી હતી.

​​​​​​​જવાબમાં ઉતરેલી હૈદરાબાદની ટીમ 20 ઓવરમાં 6 વિકેટ ગુમાવીને માત્ર 186 રન જ બનાવી શકી હતી. ટીમ તરફથી અભિષેક શર્માએ સૌથી વધુ 74 રન બનાવ્યા હતા, જ્યારે હેનરિક ક્લાસેને 23 રનનું યોગદાન આપ્યું હતું. ગુજરાતના બોલરોએ શિસ્તબદ્ધ બોલિંગ કરી હૈદરાબાદના બેટ્સમેનોને કાબૂમાં રાખ્યા હતા. મોહમ્મદ સિરાજ અને પ્રસિદ્ધ ક્રિષ્નાએ 2-2 વિકેટ ઝડપી હતી.

આ જીત ગુજરાત ટાઇટન્સ માટે ખૂબ જ મહત્વપૂર્ણ છે, કારણ કે તેનાથી ટીમ પ્લેઓફની રેસમાં વધુ મજબૂત બની છે. બીજી તરફ, હૈદરાબાદે 10 મેચમાંથી 7માં હારનો સામનો કરવો પડ્યો છે, જેના કારણે તેમનું પ્લેઓફમાં પહોંચવાનું સપનું હવે લગભગ મુશ્કેલ દેખાઈ રહ્યું છે.