ગુજરાતના પૂર્વ મુખ્ય પ્રધાન શંકરસિંહ વાઘેલાએ ફરીથી એક નવા પક્ષની રચના કરી છે. શંકરસિંહે પ્રજા શક્તિ ડેમોક્રેટિક પાર્ટીની રચના કરી છે. પ્રજા શક્તિ ડેમોક્રેટિક પાર્ટીનું ચૂંટણી ચિન્હ ભાલો રાખવામાં આવ્યું છે. રાજ્ય ચૂંટણી આયોગના આદેશથી, શંકરસિંહ વાઘેલાના પ્રજા શક્તિ ડેમોક્રેટિક પાર્ટીને ચૂંટણી ચિન્હ મળ્યું છે. અત્રે ઉલ્લેખનીય છે કે, શંકરસિંહ વાઘેલાએ આ ત્રીજો રાજકીય પક્ષ સ્થાપ્યો છે.

નવી પાર્ટીનું નામ 'પ્રજા શક્તિ ડેમોક્રેટિક' નક્કી કરાયું

શંકરસિંહ વાઘેલાની નવા પાર્ટીનાં નામની વાત કરીએ તો તેનું નામ હાલ 'પ્રજા શક્તિ ડેમોક્રેટિક' નક્કી કરાયું છે. શંકરસિંહ વાઘેલા સીધી રીતે પાર્ટીનાં કોઈ હોદ્દા પર નહીં હોય. જણાવી દઈએ કે આ પહેલા પણ સપ્ટેમ્બર મહિનામાં એવા સમાચાર સામે આવ્યા હતા કે દશેરાનાં બીજા જ દિવસે નવા રાજકીય પક્ષની રચના અને લોન્ચિંગ માટે શંકરસિંહ વાઘેલા બાપુનાં નેતૃત્વમાં પૂરજોશમાં તૈયારીઓ શરૂ કરાશે. જો કે ત્યાર બાદ કોઈ જાહેરાત ન થતા ચર્ચાઓ શાંત થઈ હતી. પરંતુ, હવે ફરી એકવાર શંકરસિંહ 'બાપુ' ને લઈ ચર્ચાઓને વેગ મળ્યો હતો.